Пакистандики қәбилә рәиси осма бин ладин вә молла өмәргә панаһлиқ беришкә тәйяр икәнликини билдүрди


2007.04.21
Share on WhatsApp
Share on WhatsApp

Пакистан- афғанистан чегра районида панаһланған өзбек милитантлар вә уларниң йәрлик қоллуғучилириға қарши һәрикәт елип бериватқан пәштун қәбилә рәһбири молла нәзир әхмәт, әгәр йәрлик қәбилиләрниң қаидә-қанунлириға вә әнәнилиригә һөрмәт қилидиғанлиқини вәдә қилса, осма бн ладинғиму районда панаһлиқ беридиғанлиқини билдүрди.

Молла нәзир әхмәт җүмә күни мухбирларға бәргән баянатида, пәштун миллий әнәнисиниң панаһлиқ тәләп қилған чәтәлликләргә панаһлиқ берилишигә капаләтлик қилидиғанлиқини вә осма бин ладин вә молла өмәр қатарлиқ кишиләрниң буниң сиртида қалмайдиғанлиқини тәкитлигән. Лекин у осма бин ладин вә молла өмәр билән мунасивити йоқлиқини һәмдә уларниң қайси йәрдә икәнликини һәққидә һечқандақ мәлуматқа игә әмәсликини билдүрди.

Чәтәллик милитантларға болупму, өзбекистан исламий һәрикитиниң рәһбири таһир йолдаш рәһбәрликидики өзбек милитантларға қарши һәрикәтниң давамлишидиғанлиқини тәкитлигән молла нәзир, "әгәр чәтәлллик милитантлар тәслим болса, уларни кәчүрүм қилимиз. Лекин өзбек милитантлар буниң сиртида" дәп көрсәтти.

Афғанистандики талибанлар һакимийити 2001‏- йили америкиниң һәрбий һәрикити нәтиҗисидә гумран болғандин кейин, миңлиған өзбек, чичән вә әрәб қатарлиқ миңлиған чәтәллик милитант афғанистандин қечип пакистанниң қәбилиләр районида панаһланған.

Райондики пәштон қәбилилири уларға панаһлиқ бәргән иди. Лекин пакистан- афғанистан чегра районидики қәбилиләр март ейида бир қәбиләр рәһбири чәтәллик милитантлар тәрипидин өлтүрүлгәндин кейин, пакистан армийисиниң ярдими билән чәтәллик милитантларға асасән өзбек милитантлириға қарши һуҗумға өтди.

Молла нәзиз әхмәтниң ейтишичә, йеқинқи һәптиләрдә пакистан армийисиниң ярдими билән елип берилған һәрикәтләрдә районда 300 әтрапида чәтәллик милитант өлгән. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт