Béyjing, rimning yéngi papasi bilen munasiwetni yaxshilashni ümid qilmaqta

Xitay hökümiti yekshenbe küni watikanning rehbiri bolghan rim papasi jon pa'ul 2 ning ölümige hésdashliqini bildürdi hemde uning warisi bilen ikki terep munasiwitini yaxshilashni ümid qilidighanliqini ipadilidi.

Roytiris agéntliqining xewirige qarighanda, xitay tashqi ishlar ministirliqining bayanatchisi liyujenchaw bayanatida, "biz rim papasi jon pa'ul 2 ning késellik sewebidin ölüp ketkenlikige teziye bildürimiz" dégen. U bayanatida yene "xitay hökümiti ikki xil pirinsipta ching turghan asasta watikanning yéngi rehbiri bilen munasiwitimizni yaxshilashni ümid qilimiz" dep körsetken.

Xitay bilen watikanning diplomatik munasiwitini yoq bolup, xitay kompartiyisi hakimiyet béshigha chiqip, her xil dinlarni basturup, chet'ellik din tarqatquchilarni chégridin qoghlap chiqarghandin kiyin, ikki terepning diplomatik munasiwiti 1951 - yili üzülgen. Watikan, xitayning reqibi bolghan teywenni étirap qilidu.

Xewerde éytilishiche, rim papasi jon pa'ul 2 ning ölüm xewiri chet'el metbu'atlirida keng kölemde bérilgini bilen, biraq xitayning metbu'atlirida köp tekitlenmigen. Xitay hökümiti gerche xitay katoliklirining dölet yol qoyghan chirkawlarda pa'aliyet élip bérishigha yol qoysimu, biraq katolik muritlirining watikan diniy jem'iyitining hakimiyitini étirap qilishni chekleydu. Xitay hökümiti shundaqla yer asti chirkawlarda diniy pa'aliyetlerni élip barghan katolik muritlirini basturup, tutqun qilidu. (Arzu)