Хитай рим папасиниң дәпнә мурасимиға вәкил әвәтмиди

Рим папаси җон паул 2 ниң дәпнә мурасими җүмә күни ватикан шәһиридә өткүзүлди. Униңға 200 дин ошуқ дунядики һәрқайси дөләт рәһбәрлири вә диний рәһбәрләр қатнашти. Әмма хитай һөкүмити буниңға вәкил әвәтмиди.

Хитай ташқи ишлар министирлиқиниң баянатчиси чин гаң мухбирларни күтивелиш йиғинида, хитай һөкүмитиниң илгири рим папасиниң вапитиға болған қайғусини ипадилигәнликини, шуңа һазирқи әһвалға асасән ватиканға вәкил әвәтмигәнликини билдүрди.

Хитай әсли рим папасиниң вапати мунасивити билән униң дәпнә мурасимиға бир вәкилләр өмики әвәтишни пиланлиған болуп, лекин италийә һөкүмитиниң тәйвән президенти чен шүйбийәнгә ватиканға кириш визиси бәргәнлики сәвәбидин, хитай бу пиланини дәрһал өзгәрткән.

Хитай һөкүмити 50 - йиллири хитайдики чәтәллик дин тарқатқучиларни қоғлап чиқарғандин буян, ватикан хитай билән болған дипломатик мунасивитини үзгән иди.

Әнглийә б б с радио-телевизийә ширкити хәвиридә, рим папасиниң һаят чеғида хитай билән болған мунасивәтни әслигә кәлтүрүшни изчил халап кәлгәнликини, әмма хитай болса ватиканға, тәйвән билән болған дипломатик мунасивәтни үзүш һәмдә хитайниң ички ишиға арилашмаслиқтәк икки шәртни қоюп туривалғанлиқи сәвәбидин, икки тәрәп мунасивитиниң техичә әслигә кәлмигәнликини мәлум қилди.

Җүмә күнидики дәпнә мурасимда җон паул 2 ниң җәсити ватикандики сент петер черкавиниң аситидики қәбригә көмүлди. Шундақла бу күндә пүтүн дунядики католик дини муритлири униңға дуа қилди. (Пәридә)