Xitay rim papasining depne murasimigha wekil ewetmidi

Rim papasi jon pa'ul 2 ning depne murasimi jüme küni watikan shehiride ötküzüldi. Uninggha 200 din oshuq dunyadiki herqaysi dölet rehberliri we diniy rehberler qatnashti. Emma xitay hökümiti buninggha wekil ewetmidi.

Xitay tashqi ishlar ministirliqining bayanatchisi chin gang muxbirlarni kütiwélish yighinida, xitay hökümitining ilgiri rim papasining wapitigha bolghan qayghusini ipadiligenlikini, shunga hazirqi ehwalgha asasen watikan'gha wekil ewetmigenlikini bildürdi.

Xitay esli rim papasining wapati munasiwiti bilen uning depne murasimigha bir wekiller ömiki ewetishni pilanlighan bolup, lékin italiye hökümitining teywen prézidénti chén shüybiyen'ge watikan'gha kirish wizisi bergenliki sewebidin, xitay bu pilanini derhal özgertken.

Xitay hökümiti 50 - yilliri xitaydiki chet'ellik din tarqatquchilarni qoghlap chiqarghandin buyan, watikan xitay bilen bolghan diplomatik munasiwitini üzgen idi.

En'gliye b b s radi'o-téléwiziye shirkiti xewiride, rim papasining hayat chéghida xitay bilen bolghan munasiwetni eslige keltürüshni izchil xalap kelgenlikini, emma xitay bolsa watikan'gha, teywen bilen bolghan diplomatik munasiwetni üzüsh hemde xitayning ichki ishigha arilashmasliqtek ikki shertni qoyup turiwalghanliqi sewebidin, ikki terep munasiwitining téxiche eslige kelmigenlikini melum qildi.

Jüme künidiki depne murasimda jon pa'ul 2 ning jesiti watikandiki sént pétér chérkawining asitidiki qebrige kömüldi. Shundaqla bu künde pütün dunyadiki katolik dini muritliri uninggha du'a qildi. (Peride)