Putin: sowét ittipaqining parchilinishi dunya siyasi jughrapiyisidiki zor palaket

Rusiye prézidénti wladimir putin düshenbe küni rusiyining dölet ehwali heqqide téléwizor nutqi sözlep, sabiq sowét ittipaqining 1991 - yildiki parchilinishini "20 - esir dunya siyasi jughrapiyisidiki zor palaket," dep körsetti.

Putinning tekitlishiche, sowét ittipaqining tarqilishi nechche milyon rusning yaqqa - yurtlarda qélishigha yol achqan. Emma rusiye prézidénti, rusiye duch kéliwatqan hazirqi riqabet tereqqiyatni ilgiri sürüsh we döletni démokratiyileshtürüsh, dep körsetti. U, metbu'at erkinliki heqqide toxtalghan, emma rusiyining démokratiye islahat qedimini özi tallaydighanliqini tekitligen. Putin iqtisadi mesililer heqqide " hazir xelq turmushidiki halqiliq sahelerni dölet kontrol qilish kéreklikini aydinglashturush waqti keldi." Dégen.

Yélitsin dewridin kéyin wladimir putin rusiyide hoquqni merkezge merkezleshtürüsh qedimini tézlitishke bashlighan. Amérika tashqi ishlar ministiri kondiliza rayis ötken hepte mokswani ziyaret qilghanda, rusiye démokratiyisining istiqbalidin qayghuruwatqanliqini tekitligen. Emma putin, düshenbe künki nutuqida " rusiye démokratiyisi rusiyining dölet ehwalini chiqish qilidighanliqini bildürdi. U, rusiyide " qanunsiz küresh usulliri" ning otturigha chiqishigha yol qoymaydu, dédi.

Közetküchilerning ilgiri sürüshiche, wladimir putin bu yerde groziye, ukra'iniye we qirghizistandiki tinch siyasi ögürüshlerni közde tutqan. Kishilik hoquqni qoghdighuchilar, prézidént putinni metbu'at erkinlikini boghup, öktichilerge zerbe bérish shundaqla mustebitlikke éghish bilen eyiblimekte idi. (Erkin)