En'giliyining paytexti londonda yüz bergen partlashlarda nurghun kishi öldi we yarilandi


2005.07.07
Share on WhatsApp
Share on WhatsApp

Peyshenbe küni en'giliyining paytexti londondiki üch yer asti poyiz istansisi we bir aptobusta yüz bergen partlashlarda nurghun kishi ölgen we yarilan'ghan. London waqti peyshenbe küni kech sa'et sekkizgiche ölgenlerning qiriqtin, yarilan'ghanlar 700 din ashqan.

Seherde kishilerning ishqa méngish waqtida yüz bergen bu partlash, ikkinchi dunya urushidin kéyin london shehiride yüz bergen tesir küchi eng chong bolghan partlash iken. Buningdin bir kün burun yeni charshenbe kün en'giliye xelqi, london shehirining 2012- yilidiki olimpik tenterbiye yighinigha sahipxanliq qilish hoquqini qolgha keltürgenlikini alahide murasimlar bilen qutluqlighan idi.

Sekkizler guruhi dep atalghan, dunyadiki sana'etleshken sekkiz dölet rehbirining shotlandiyidiki aliy derijilik yighinigha riyasetchilik qiliwatqan en'giliye bash ministiri toni bleyir, londondiki partlashlarni wehshiyane bir hujum dep tebirlidi.

Toni bleyir mundaq dédi: "bu hujumni élip barghanlar üchün insan hayatining héchqandaq qimmiti yoq. Bu hujum peqet bir döletkila emes, pütün döletlerge we pütün medeniyetperwer xelqlerge qaritilghan hujum hésablinidu. Biz térorchiliqqa qarshi turush we uni meghlub qilish üchün birlikte heriket qilimiz".

Londondiki partlashlar pütün dunyada qattiq ghulghula qozghidi. Pütün dunya rehberliri bu partlashni keltürüp chiqarghuchilarni qattiq eyiblidi.

Dunyadiki sana'etleshken sekkiz dölet rehberler yighinigha qatnishiwatqan amérika prézidénti jorj bush, londondiki partlashlar heqqide bergen bayanatida, "térrorchiliqqa qarshi urush dawamlishiwatidu. Men bu zaldiki pütün rehberlerning térrorchilargha boyun egmesliktek iradisidin tesirlendim", dédi.

Yighin'gha qatnishiwatqan bashqa dölet rehberlirimu, londondiki hujumlargha lenet oqup, bu jinayetni sadir qilghuchilarni tépip, ularni adaletke teslim qilishta en'giliye bilen yéqindin hemkarlishidighanliqini bildürdi. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.