Daghistanda poyiz partlidi

Yekshenbe küni rusiyining daghistan jumhuriyitide bir poyiz partlap, wagonlar rélistin chiqip ketken.

Bbs agéntliqining uchuridin melum bolushiche, weqe yüz bergen jayda we daghistanning paytexti maxachqala shehiride étishishlar yüz bérip, saqchi xadimliri yarilan'ghan.

Partlashqa uchrighan poyiz passajirlar poyizi bolup, uningda texminen 400din 500 ghiche adem barliqi bildürülgen bolsimu, emma ölgen we yarilan'ghanlarning sani éniq emes.

Daghistan chéchiniyige qoshna bolup, bu yerde qumuq, lézgin, awar qatarliq türkiy we kawkaz tilliri a'ilisige mensup 30 nechche musulman millet yashaydighan murekkep bir jumhuriyettur.

Yéqinqi yillardin buyan mezkur jumhuriyette saqchilargha hujum qilish, istratégiyilik nuqtilarni partlitish weqeliri köplep yüz bermekte. Hetta bu yil may éyida daghistan jumhuriyitining milliy siyaset ishliri ministiri öltürülgen idi.

Rusiye hökümiti daghistanningmu xuddi chéchiniyidek musteqilliq terepdarliqidiki jumhuriyetke aylinip, omumiy yüzlük qarshiliq heriketlirining yüz bérishidin endishe qilmaqta. (Ümidwar)