Америка хитайдики қанунсиз көчүрүп тарқитиш мәсилисини қаттиқ тәнқид қилди


2005.03.31

Америка һөкүмити чаршәнбә күни йиллиқ сода доклатини елан қилип, хитай һөкүмитиниң қанунсиз көчүрүп тарқитиш мәсилисини үнүмлүк һәл қилалмиғанлиқини тәнқид қилди.

Америка сода вәкиллири елан қилған 672 бәтлик мәзкур доклатта ейтилишичә, өткән йили америка вә хитай оттурисидики сода ихтилаплири көрүнәрлик һалда күчәйгән. Болупму хитайда қанунсиз көчүрүп- тарқитиш вә патент һоқуқини оғрилаш қатарлиқ мәсилиләр интайин еғир болуп, бу америкиниң киночилиқ, компютер юмшақ диталлирини ишләпчиқириш, кийим- кечәк вә башқа саһәлиригә зор зиян елип кәлгән.

Доклатта йәнә америка тәрәп, хитай һөкүмитиниң 2001 - йили дуня сода тәшкилатиға киргәндә, базирини ечиветиш һәққидә бәргән вәдисигә әмәл қилмиғанлиқини әйиблигән һәмдә америка маллириниң екиспорт қилинишиға тосалғу боливатқан барлиқ амилларни йоқитиш нийитини ипадилигән.

Хитай һөкүмити болса пәйшәнбә күни америкиниң әйипләшлирини рәт қилип, өзиниң қанунсиз көчүрүп тарқитиш һәрикәтлиригә актиплиқ билән зәрбә берип, хитай вә чәтәл ширкәтлириниң мәнпәәтини қоғдаватқанлиқини билдүрди.

Бирақ ғәрб әллири ширкәтлири , хитайдики қанунсиз көчүрүп тарқитиш вә патент һоқуқини оғрилаш қилмишлириниң өзлиригә йилиға 16 милярд долларлиқ зиян селиватқанлиқини билдүрмәктә. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.