Amérika xitaydiki qanunsiz köchürüp tarqitish mesilisini qattiq tenqid qildi

Amérika hökümiti charshenbe küni yilliq soda doklatini élan qilip, xitay hökümitining qanunsiz köchürüp tarqitish mesilisini ünümlük hel qilalmighanliqini tenqid qildi.

Amérika soda wekilliri élan qilghan 672 betlik mezkur doklatta éytilishiche, ötken yili amérika we xitay otturisidiki soda ixtilapliri körünerlik halda kücheygen. Bolupmu xitayda qanunsiz köchürüp- tarqitish we patént hoquqini oghrilash qatarliq mesililer intayin éghir bolup, bu amérikining kinochiliq, kompyutér yumshaq ditallirini ishlepchiqirish, kiyim- kéchek we bashqa sahelirige zor ziyan élip kelgen.

Doklatta yene amérika terep, xitay hökümitining 2001 - yili dunya soda teshkilatigha kirgende, bazirini échiwétish heqqide bergen wedisige emel qilmighanliqini eyibligen hemde amérika mallirining ékisport qilinishigha tosalghu boliwatqan barliq amillarni yoqitish niyitini ipadiligen.

Xitay hökümiti bolsa peyshenbe küni amérikining eyipleshlirini ret qilip, özining qanunsiz köchürüp tarqitish heriketlirige aktipliq bilen zerbe bérip, xitay we chet'el shirketlirining menpe'etini qoghdawatqanliqini bildürdi.

Biraq gherb elliri shirketliri , xitaydiki qanunsiz köchürüp tarqitish we patént hoquqini oghrilash qilmishlirining özlirige yiligha 16 milyard dollarliq ziyan séliwatqanliqini bildürmekte. (Arzu)