Хитай, пәләстин билән иқтисадий җәһәттә һәмкарлишишқа вәдә қилди

Пәләстин рәһбири маһмуд аббас чаршәнбә күни бейҗиңда, хитайниң юқири дәриҗилик әмәлдарлири билән көрүшти. Шундақла оттура асиядики тәсир даирисини кеңәйтишкә алаһидә күчәватқан хитай һөкүмити пәләстин билән иқтисадий һәмкарлиқ орнитишқа вәдә қилди.

Арафат вапатидин кейин униң орниға чиққан пәләстин рәһбири маһмуд аббас хитайдики бу тунҗи қетимлиқ зияритидә, хитай рәиси ху җинтав вә баш министир вен җябавлар билән көрүшти.

Франсийә агентлиқиниң хәвиригә қариғанда, ху җинтав маһмуд аббас билән көрүшкәндә, хитай билән пәләстин оттурисидики узун мәзгиллик достлуқ мунасивитини тәрәққий қилдурушниң, хитайниң дөләт сиясити икәнликини, шундақла икки дөләтниң юқири дәриҗилик әмәлдарлири вә һоқуқтики партийиләр оттурисида алақә бағлап турушниң икки дөләт достлуқини илгири сүрүшкә пайдилиқ икәнликини билдүрди. Шундақла икки тәрәп 5 түрлүк сода келишими имзалиди.

Маһмуд аббас хитайға келиштин авал японийини зиярәт қилған. Шундақла у японийидин 100 милйон долларлиқ ярдәмгә еришкән иди. Күзәткүчиләр хитай һөкүмитиниң японийә билән риқабәтлишиш вә оттура шәрқ сиясий сәһнисидә рол ойнаш мәқситидә пәләстингә йеқинлишиватқанлиқини пәрәз қилмақта. (Пәридә)