Президент буш исраилийә билән пәләстинниң келишим һасил қилишидин үмидвар


2008.01.10

Вәзипә өтүш җәрянида тунҗи қетим оттура шәрқтә зиярәттә болуватқан америка президенти җорҗ буш өзиниң, бу йил ичидә исраилийә билән пәләстин оттурисида тенчлиқ келишими барлиққа келишидин үмидвар икәнликини билдүрди.

Америка президенти пәйшәнбә күни пәләстин миллий һакимйити оргининиң рәиси аббас билән көрүшүп, оттура шәрқниң вәзийитини тенчландуруш һәққидә сөһбитини башлиди. Чаршәнбә күни буш исраилийә баш министири перис билән үч саәткә йеқин сөһбәтләшкән иди. Исраилийә баш министири перис буш билән сөһбитини аяқлаштурғандин кейин, мәтбуатларға өзиниң аббас билән бирликтә тенчлиқ келишими һасил қилишқа әстайидиллиқ билән муамилә қилиш қарариға кәлгәнликини билдүргән .

Бирақ перис сөзидә, әгәр ғәззидә хаммас контроллуқидики радикалчиларниң тәһдити давамлишивәрсә пәләстинликләр билән чүшиниш һасил қилишниң йәнила қейин болидиғанлиқини тәкитлиди.

Президент буш исраилийидики зияритидин кейин, пәләстин ‏- исраилийә икки тәрәпниң қарар чиқиришиниң асанға тохтимайдиғанлиқини, бирақ икки дөләтниң ахирқи қетим мәсилини һәл қилиш чарисини бекитишиниң өзи һәр икки тәрәп үчүн тарихи әһмийәткә игә болидиғанлиқини тәкитлиди.

Америка президенти җорҗ буш, 9 ‏- январ күни исраилийигә йетип берип, оттура шәрқтә елип баридиған зияритини башлиди, призидент буш 16 ‏- январғичә пәләстин, күвәйт, бәһрәйн, әрәб бирләшмә хәлипилики, сәуди әрәбистани вә мисир қатарлиқ дөләтләрдә зиярәттә болмақчи. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.