Намайишчилар аббасниң истипа беришини тәләп қилди

Фатах һәрикитиниң пәләстин парламент сайлимидики мәғлубийитидин кейин, фатах һәрикитиниң қоллиғучилири җүмә күни газада намайиш өткүзүп, пәләстин аптономийисиниң рәһбири махмуд аббастин истипа беришни тәләп қилди. Намайишчилар, фатах һәрикитини хиянәтчилик вә иқтидарсизлиқ билән әйиблигән.

Бирләшмә ахбарат агентлиқиниң әскәртишичә, пәләстин парламент сайлимида ислами радикал күчләр хамас һәрикитиниң ғәлибә қилишида, фатахниң ички қисимидики хиянәтчилик сәтчилики вә һакимийәт башқуруштики иқтидарсизлиқи сәвәбчи билған. Хамас сайламда пәләстин парламентидики 132 орунниң 76 сини игиләп, пәләстин һөкүмитини тәшкилләш һоқуқиға еришкән иди.

Махмуд аббасниң ашкарилишичә, у хамастин һөкүмәт қуруш пиланини тәләп қилған. Хамас һәрикити фатах билән " һәмкарлишиш вә шериклишиш " йоллири үстидә издиниватқанлиқини билдүрмәктә. Хамас сайламда ғәлибә қилғандин кейин, хәлқара җәмийәтниң зораванлиқ һәрикәтлиридин ваз кечиш тоғрисидики җиддий бесимиға дүч кәлди.

Ғәрб әллири, хамас исраилийини хәритидин йоқитиш пиланидин ваз кәчмигичә пәләстингә беридиған ярдәмниң тохтитилидиғанлиқини агаһландурмақта. Фатах һәрикитиниң қоллиғучилири намайиш җәрянида фатах һәрикитиниң барлиқ рәһбәрлиридин истипа беришни тәләп қилған. Намайишчилар арисида фатах һәрикитиниң қораллиқ қанитидин әл - ақса бригадисиниң адәмлириму бар икән. Бу арида б б с ниң хәвәрқилишичә, газадики хан юнус шәһири әтрапида хамасниң қоллиғучилири билән фатах тәрәпдарлири арисида тоқунуш келип чиқип, 3киши яриланған. (Әркин)