Түркийә билән ирақ курд партизанлирини бирликтә бастурмақчи

Б б с радио телевизийисиниң сәйшәнбә хәвәр беришичә, түркийә баш министири тайип әрдуған, 23 - өктәбир әнглийигә йетип келип әнгилийә баш вәзири билән түркийә кризиси һәққидики сөһбити җәрянида,ирақниң түркийә қисимлири билән һәмкарлишип ирақниң шималидики курд партизанлириға бирликтә бесим ишлитидиғанлиқини билдүргән.

Өткән йәкшәнбә күни түркийә ‏- ирақ чегрисида түркийә әскәрлири курд партизанлириниң һуҗумиға учрап 12 нәпәр түрк әскири өлгән 16 си яриланған шундақла һазирға қәдәр йәнә сәккиз әскәрниң из дерики елинмиди. Бу түрк әскәрлири билән курдлар оттурисида йүз бәргән тоқунушларда һазирға қәдәр әң көп адәм чиқим болған бир қетимлиқ қораллиқ тоқунуш һесаблиниду.

Бу вәқәдин кейин түркийә һәрбий қисимлири ирақ чегриси әтрапида курд партизанлирини кәң көләмлик тазилаш һәрикитини башлиди. Әнгилийә б б с радио телевизийисиниң хәвиридә көрситишичә, бу қетимлиқ тазилаш һәрикитидә 30 дин артуқ курд қаршилашқучилири өлтүрүлгән. Нөвәттә түркийиниң һәр қайси җайлирида хәлқ наразилиқ намайишлар арқилиқ һөкүмәтниң курдларға қарши йәниму җиддий тәдбир қоллинишини тәләп қилмақта.

Б б с ниң хәвиридә әскәртишичә, түркийә ичидә хәлқниң курдларни бастурушта җиддий тәдбир қоллиниш бесимиға дуч келиватқан пәйттә, йәнә бир тәрәптин хәлқара җәмийәтниң курдларға қарита тәмкин позитсийә тутуш керәкликидәк ташқи бесимға дуч кәлмәктә икән.

Америка түркийиниң кризисини бир тәрәп қилишқа ярдәмлишидиғанлиқи һәққидә вәдә бәргәндин сирт, алдинқи күни ирақ һөкүмитиниң курдларниң түркийигә қайта һуҗум қилишиниң алдини елишқа һәрикәт қоллинишни қаттиқ тәләп қилған иди. (Гүлчеһрә)