Türkiye bilen iraq kurd partizanlirini birlikte basturmaqchi

B b s radi'o téléwiziyisining seyshenbe xewer bérishiche, türkiye bash ministiri tayip erdughan, 23 - öktebir en'gliyige yétip kélip en'giliye bash weziri bilen türkiye krizisi heqqidiki söhbiti jeryanida,iraqning türkiye qisimliri bilen hemkarliship iraqning shimalidiki kurd partizanlirigha birlikte bésim ishlitidighanliqini bildürgen.

Ötken yekshenbe küni türkiye ‏- iraq chégrisida türkiye eskerliri kurd partizanlirining hujumigha uchrap 12 neper türk eskiri ölgen 16 si yarilan'ghan shundaqla hazirgha qeder yene sekkiz eskerning iz dériki élinmidi. Bu türk eskerliri bilen kurdlar otturisida yüz bergen toqunushlarda hazirgha qeder eng köp adem chiqim bolghan bir qétimliq qoralliq toqunush hésablinidu.

Bu weqedin kéyin türkiye herbiy qisimliri iraq chégrisi etrapida kurd partizanlirini keng kölemlik tazilash herikitini bashlidi. En'giliye b b s radi'o téléwiziyisining xewiride körsitishiche, bu qétimliq tazilash herikitide 30 din artuq kurd qarshilashquchiliri öltürülgen. Nöwette türkiyining her qaysi jaylirida xelq naraziliq namayishlar arqiliq hökümetning kurdlargha qarshi yenimu jiddiy tedbir qollinishini telep qilmaqta.

B b s ning xewiride eskertishiche, türkiye ichide xelqning kurdlarni basturushta jiddiy tedbir qollinish bésimigha duch kéliwatqan peytte, yene bir tereptin xelq'ara jem'iyetning kurdlargha qarita temkin pozitsiye tutush kéreklikidek tashqi bésimgha duch kelmekte iken.

Amérika türkiyining krizisini bir terep qilishqa yardemlishidighanliqi heqqide wede bergendin sirt, aldinqi küni iraq hökümitining kurdlarning türkiyige qayta hujum qilishining aldini élishqa heriket qollinishni qattiq telep qilghan idi. (Gülchéhre)