Rusiye prézidénti putin amérikida bush bilen körüshti

Rusiye prézidénti wladimir putin yekshenbe küni özining amérika qoshma shtatlirigha qaratqan istratégiyilik ziyaritini bashlidi. Putin yekshenbe küni mayin shtatigha yétip kélip, atlantik okyan boyidiki kénnébunkport dégen jaydiki prézidént bushning turalghusida uning bilen körüshti.

Putinning bu qétim bushning öyide uning bilen ayrim körüshüshi amérika-rusiye munasiwetliri üchün nahayiti ehmiyetlik bolup, ikki terep arisida yéqindin buyan shekillen'gen hemde ixtilapliq tüs alghan bir qatar mesililer boyiche ortaq tonushqa kélip, mesililerni hel qilishni ilgiri sürüsh rolini oynishi mumkin iken.

Putin bu nöwet amérikida ikki kün ziyarette bolidu, bu jeryanda ikki rehber kosowaning musteqilliqi mesilisi, amérikining sherqiy yawropa bashqurulidighan bombidin mudapi'e körüsh sistémisi mesilisi shuningdek iranning yadro pilanini öz ichige alghan bir qatar xelq'araliq hem rayon xaraktérliq mesililer boyiche söhbet élip baridu.

Amérikining polsha bilen chéxta bashqurulidighan bombidin mudapi'e körüsh sistémisi ornitish pilani rusiyini bi'aram qilghan bolup, gerche washin'gton köp qétim buning rusiyige tehdit peyda qilmaydighanliqini chüshendürgen bolsimu, biraq, moskwa izchil halda mezkur sistémidin qorqup kelgen. Ötken ayda prézidént bush pragada ziyarette bolghanda hemde gérmaniyidiki sekkiz sana'etleshken dölet bashliqliri yighini jeryanida putinni qorqmasliqqa dewet qilghanda putin mezkur sistémini ezerbeyjan'gha orunlashturushni otturigha qoyghan.

Kosowa mesiliside amérika rusiyidin b d t ning kosowa musteqilliqi layihisini qollashni telep qilghan bolsimu, lékin rusiye izchil halda kosowani sérbiyining bir aptonom ölkisi dep qarap, uning musteqilliqighe qarshi chiqqan idi. Uning üstige washin'gton moskwani démokratiyide chékinip ketkenliki bilenmu tenqid qilghan idi.

Rusiye-amérika munasiwetliri közetküchiliri bush -putin uchirishishining krémil bilen aq saray arisidiki ixtilaplarni axirlashturush shuningdek ottura sherq, shimaliy koriye we bashqa mesililiridimu ikki terep menpe'etlirige uyghun chüshenchilerning peyda bolushini ilgiri süridighanliqini otturigha qoyushmaqta. Bu qétim chong bushmu putin bilen a'iliwi dostlar sheklide körüshsimu, lékin resmiy söhbetlerge ishtirak qilmaydiken. (Ümidwar)