Путин билән буш хамасниң москва зиярити һәққидә сөзләшти

Русийә президенти владимир путин шәнбә күни америка президенти җорҗи бушқа телефон берип, хамас вә иранниң бир вәкилләр өмикиниң русийидә зиярәттә болғанлиқи һәмдә русийиниң бу мәсилигә тутқан мәйдани һәққидә музакириләшкән.

Америка авази радиосиниң ақ сарай баянатчисиниң сөзидин нәқил кәлтүрүшичә, президент буш путинға хамасниң исраилийини етирап қилиши һәмдә қораллиқ һәрикәттин ваз кечиши лазимлиқини тәкилигән.

Русийә вә америка президентлири йәнә иранниң ядро мәсилиси һәққидиму сөзләшкән болуп, бирақ ақ сарай билән кремилниң иран мәсилиси һәққидә қандақ позитсийигә кәлгәнлики техи мәтбуатқа ашкариланмиди.

Бу йил 1-айда сайламда ғәлибә қилған пәләстин мустәқиллиқини арзу қилидиған исламий тәшкилат хамас владимир путин тәрипидин москваға тәклип қилинғанда америка башлиқ ғәрб дөләтлири буниңдин һәйранлиқ һес қилған иди.

Хамасниң алтә кишилик вәкилләр өмики өткән һәптә москваға келип, русийиниң мунасивәтлик даирилири җүмлидин русийә ташқи ишлар министири сергей лавроп қатарлиқлар билән сөһбәт өткүзгән. Шәнбә күнидики сөһбәттә, хамас вәкиллири русийә ташқи ишлар министири лавропниң хамасниң уруш тохтитиш һәм исраилийини етирап қилиш тәклипини рәт қилип, әгәр исраилийә 1967-йили бесивалған земинләрдин чекинип чиқмиса һәмдә түрмидики пәләстинликләрни қоюп бәрмисә вә пәләстин мусапирлирини өз юртлириға қайтурмиса, хамасниң өз мәйданидин янмайдиғанлиқини билдүргән, шуниңдәк әгәр исраилийә қорал ишләтмәсликкә мақул болсила, хамасниңму бир йил уруш тохтитидиғалиқини билдүргән.(Үмидвар)