Qara tagh jumhuriyiti musteqilliq üchün omumiy xelq awaz bérish ötküzdi

Yugoslawiye fédératsiyisige tewe qara tagh jumhuriyiti 21-may küni mezkur jumhuriyetning musteqilliqi üchün omumiy xelq awaz bérish ötküzdi.

B b s agéntliqining uchurigha asaslan'ghanda, bu omumiy xelq awaz bérish pa'aliyitige yawropa ittipaqi arilashqan bolup, eger 55% adem musteqilliqni qollashqa bélet tashlisa, qara tagh jumhuriyiti resmi musteqilliq jakarlash salahiyitige érishidiken.

Qara tagh jumhuriyiti eslide yugoslawiye ittipaqdash jumhuriyetlirining biri bolup, 90-yillarda yugoslawiyige tewe xarwatiye, slowéniye, makédoniye qatarliqlar uningdin ayrilip musteqilliq jakarlighanda, qara tagh jumhuriyiti bélet tashlash arqiliq yugoslawiye terkibide qélishni qarar qilghan hemde sérbiye jumhuriyiti bilen birliship, yéngi yugoslawiye fédératsiyisini qurup, uni " sérbiye-qara tagh " dep atighan shuningdek üch yildin kéyin omumiy xelq bélet tashlash arqiliq kélechek siyasiy teqdirini belgileshni qarar qilghan idi. Axiri, 14 yildin kéyin, bu emelge ashti.

Qara tagh jumhuriyitinig ahalisi 700 ming etrapida bolup, qara taghliqlar sérbler bilen til we din jehettin ortaqliqqa ige. Qara tagh rehberliri bu jumhuriyetning musteqil bolup, yawropa bilen birlishish qedimini bésish arqiliq öz iqtisadini tereqqi qildurush pikirlirini otturigha qoymaqta. Emma, yene bir qisim kishiler qara taghlarning nopusining azliqini körsitip, musteqil bolushning zörüriyitining yoqliqini chüshendürmekte.(Ümidwar)