Пакистан соти қизил мәсчит имами абдуләзизни әйиблиди


2007-07-05
Share

Пакистан сақчилири тәрипидин қолға елинған қизил мәсчитниң имами абдуләзиз, пәйшәнбә күни равалпинди шәһәрлик сот тәрипидин, террорлуқ һуҗум вә йәттә хитай пуқрасиниң гөрүгә елиниш вәқәсини пиланлиған, дәп әйибләнди.

Чаршәнбә күни ахшими, пакистан бихәтәрлик қисимлириниң қоршавидики қизил мәсчиттин пәрәнҗә кийип қечишқа урунған абдуләзиз, сақчиларниң қолға чүшүп қалған.

Абдуләзизниң оқуғучилири, 23‏- июн күни бир йиңнә билән давалаш мәркизини бесип, 6 хитай аял вә бир хитай әрни гөрүгә алған иди. Улар бу давалаш мәркизиниң әслидә бир паһишихана икәнликини билдүргән. Хитай һөкүмити бу вәқәдин кейин, пакистан һөкүмитидин пакистандики хитай ширкәтлири вә пуқралирини қоғдаш үчүн җиддий тәдбир елишни тәләп қилған.

Франисйә агентлиқиниң хәвәр қилишичә, пакистанниң йеқин иттипақдиши болған хитай һөкүмити, пакистан бихәтәрлик қисимлириниң қизил мәсчитигә қаратқан һуҗумини вә мәсчит имами абдуләзизни тутуп террорлуқ паалийити билән шуғулланған дәп, әйиблигәнликини қоллап-қуввәтлигән.

Хитай ташқи ишлар минстирлиқиниң баянатчиси чен гаң бейҗиңда мухбирларға бәргән баянатида, "хитай һөкүмити дост вә қошна бир дөләт болған пакистанниң, иҗтимаий муқимлиқини қоғдаш үчүн алған тәдбирлирини қоллайду" дегән.

Сиясий мулаһизичиләр, қизил мәсчит вәқәси , пакистандики диний гуруппиларниң хитайға болған өчмәнликини техиму күчәйтиши мумкин, дәп пәрәз қилишмақта. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт