Pakistan soti qizil meschit imami abdul'ezizni eyiblidi

Pakistan saqchiliri teripidin qolgha élin'ghan qizil meschitning imami abdul'eziz, peyshenbe küni rawalpindi sheherlik sot teripidin, térrorluq hujum we yette xitay puqrasining görüge élinish weqesini pilanlighan, dep eyiblendi.

Charshenbe küni axshimi, pakistan bixeterlik qisimlirining qorshawidiki qizil meschittin perenje kiyip qéchishqa urun'ghan abdul'eziz, saqchilarning qolgha chüshüp qalghan.

Abdul'ezizning oqughuchiliri, 23‏- iyun küni bir yingne bilen dawalash merkizini bésip, 6 xitay ayal we bir xitay erni görüge alghan idi. Ular bu dawalash merkizining eslide bir pahishixana ikenlikini bildürgen. Xitay hökümiti bu weqedin kéyin, pakistan hökümitidin pakistandiki xitay shirketliri we puqralirini qoghdash üchün jiddiy tedbir élishni telep qilghan.

Franisye agéntliqining xewer qilishiche, pakistanning yéqin ittipaqdishi bolghan xitay hökümiti, pakistan bixeterlik qisimlirining qizil meschitige qaratqan hujumini we meschit imami abdul'ezizni tutup térrorluq pa'aliyiti bilen shughullan'ghan dep, eyibligenlikini qollap-quwwetligen.

Xitay tashqi ishlar minstirliqining bayanatchisi chén gang béyjingda muxbirlargha bergen bayanatida, "xitay hökümiti dost we qoshna bir dölet bolghan pakistanning, ijtima'iy muqimliqini qoghdash üchün alghan tedbirlirini qollaydu" dégen.

Siyasiy mulahizichiler, qizil meschit weqesi , pakistandiki diniy guruppilarning xitaygha bolghan öchmenlikini téximu kücheytishi mumkin, dep perez qilishmaqta. (Eqide)