Qizil meschittiki toqunush dawamlashmaqta

Pakistan prézidénti perwaz musherrep shenbe küni islam abattki qizil meschitte qorshaw astida turuwatqan diniy oqughuchilarni derhal teslim bolushqa chaqirdi.

Musherrep islam abatta, muxbirlargha bergen bayanatida, "ular waqitni uzartmay teslim bolushi kérek. Eger qorallirini tapshurup teslim bolmisa, öltürülüshi mumkin. Biz meschitte tutup turluwatqan balilar we ayallardin endishe qiliwatimiz. Shuning üchün bu mesilige sewrchanliq bilen mu'amile qiliwatimiz" dédi.

Xewerlerge qarighanda, shenbe küni meschit etrapidiki toqunushlar kücheygen. Shenbe küni chüshte pakistan herbiy qisimliri we meschit ichidiki diniy oqughuchilar otturisida qattiq toqunushlar yüz bergen .

Qizil meschittiki radikal diniy oqughuchilargha rehberlik qiliwatqan abdulreshid ghazi, pakistan bixeterlik qisimlirining hujumida hazirghiche, 30 qiz we 40 er oqughuchining ölgenlikini, ölgen qiz oqughuchilarning meschit hoylisigha depne qilin'ghanliqini bildürdi.

Lékin pakistan hökümiti toqunushlarda 19 kishining ölgenlikini bular ichide bir esker ning mu barliqini bayan qilmaqta.

Mulla abdulreshid ghazi, meschit ichide, 25, 30 kün'ge yétidighan oq we qoral-yaraq barliqini tekitlep, urushni dawamlashturudighanliqini bildürdi.

Bu arida shenbe küni pakistan bixeterlik qisimliri qizil meschit yénidiki " feride" medrisige hujum qilip mezkur medrisining kontrolliqini qolgha alghan. Xewerlerge qarighanda feride medrisisi, qizil meschittiki radikal oqughuchilarni yardem bilen teminlewatqan muhim merkez hésablinidiken. (Ömer qanat)