Пакистандики қизил мәсчитлик талиплар билән болған сөһбәттә илгириләш болмиди
2007.07.09
Пакистан пайтәхти исламабадтики қизил мәсчитлик талиплар билән һөкүмәт арисидики тиркишиш вәзийитигә хатимә бериш мәқситидә, келиштүргүчиләрниң қизил мәсчитлик талиплар билән өткүзгән сөһбити нәтиҗисиз ахирлашқан. Пакистан учур министири муһәммәд али дурани, келиштүргүчиләрниң мәсчит рәһбәрлири билән дүшәнбә күни елип барған сөһбитидә илгириләш болмиғанлиқини җакарлиди.
Пәрвиз мушәррәп һөкүмити пакистанниң сабиқ баш министири чавдре шуҗаат башчилиқидики бир келиштүргүчиләр өмикини қизил мәсчиттики талиплар билән сөһбәт өткүзүшкә әвәткән. Лекин сөһбәт өмики мәсчиткә кирип талиплар билән йүзму - йүз сөһбәт өткүзүштин әнсиригән болуп, абдулрәшид ғази йетәкчиликидики қизил мәсчитлик талиплар мәвҗүт шәртләр астида һөкүмәткә тәслим болушни рәт қилди.
Баш министир шавкәт әзиз, әгәр абдулрәшид ғази тәслим болса, уни аилә нәзәрбәнтидә тутуп турушқа капаләт берилгәнликини билдүрмәктә. Франсийә ахбарат агентлиқиниң әскәртишичә, абдулрәшид ғази сөһбәт өмикиниң мәсчиткә киришини тәләп қилған, келиштүргүчиләр болса абдурешид ғазиниң мәсчит сиртиға чиқишини өтүнгән. Пакистан учур министири дурани,сөһбәт вәкиллириниң мәсчиткә кириши наһайити хәтәрлик болуши мумкин, дәп көрсәтмәктә.
Пакистан президенти пәрвиз мушәррәп өткән шәнбә күни әгәр талиплар тәслим болмиса, өлтүрүлидиғанлиқини агаһландурған болсиму, лекин талипларниң рәһбири абдулрәшид ғази, өлсиму тәслим болмайдиғанлиқини җакарлиған. Қизил мәсчитлик талиплар билән һөкүмәт армийиси арисидики тиркишиш башланған 7 күндин бери, аз дегәндә 21 адәм өлгән. Хәвәрләргә қариғанда мәсчит ичидә хели көп санда аяллар вә балилар болуши мумкин. (Әркин)
Мунасивәтлик мақалилар
- Қизил мәсчиттики тоқунуш давамлашмақта
- Қизил мәсчитлик талиплар рәһбири өлсиму тәслим болмамду ?
- Пакистан соти қизил мәсчит имами абдуләзизни әйиблиди
- Қизил мәсчит вәқәси хитай- пакистан мунасивәтлирини бузди
- Қизил мәсчит вәқәси хитай - пакистан мунасивитигә зәрбә бәргән
- Пакистанниң юқири дәриҗилик әмәлдари террорлуққа қарши сөһбәт өткүзүш үчүн хитайға кәлди
- Пакистан-һиндистанларда тәбиәт һадисилиридә көплигән адәмләр қазаға учриди
- Пакистан талибан оқуғучилири тәрипидин гөрүгә елинған 6 хитай қоюп берилди