Pakistandiki qizil meschitlik taliplar bilen bolghan söhbette ilgirilesh bolmidi

Pakistan paytexti islam'abadtiki qizil meschitlik taliplar bilen hökümet arisidiki tirkishish weziyitige xatime bérish meqsitide, kélishtürgüchilerning qizil meschitlik taliplar bilen ötküzgen söhbiti netijisiz axirlashqan. Pakistan uchur ministiri muhemmed ali durani, kélishtürgüchilerning meschit rehberliri bilen düshenbe küni élip barghan söhbitide ilgirilesh bolmighanliqini jakarlidi.

Perwiz musherrep hökümiti pakistanning sabiq bash ministiri chawdré shuja'at bashchiliqidiki bir kélishtürgüchiler ömikini qizil meschittiki taliplar bilen söhbet ötküzüshke ewetken. Lékin söhbet ömiki meschitke kirip taliplar bilen yüzmu - yüz söhbet ötküzüshtin ensirigen bolup, abdulreshid ghazi yétekchilikidiki qizil meschitlik taliplar mewjüt shertler astida hökümetke teslim bolushni ret qildi.

Bash ministir shawket eziz, eger abdulreshid ghazi teslim bolsa, uni a'ile nezerbentide tutup turushqa kapalet bérilgenlikini bildürmekte. Fransiye axbarat agéntliqining eskertishiche, abdulreshid ghazi söhbet ömikining meschitke kirishini telep qilghan, kélishtürgüchiler bolsa abduréshid ghazining meschit sirtigha chiqishini ötün'gen. Pakistan uchur ministiri durani,söhbet wekillirining meschitke kirishi nahayiti xeterlik bolushi mumkin, dep körsetmekte.

Pakistan prézidénti perwiz musherrep ötken shenbe küni eger taliplar teslim bolmisa, öltürülidighanliqini agahlandurghan bolsimu, lékin taliplarning rehbiri abdulreshid ghazi, ölsimu teslim bolmaydighanliqini jakarlighan. Qizil meschitlik taliplar bilen hökümet armiyisi arisidiki tirkishish bashlan'ghan 7 kündin béri, az dégende 21 adem ölgen. Xewerlerge qarighanda meschit ichide xéli köp sanda ayallar we balilar bolushi mumkin. (Erkin)