Qizil meschitte yene partlash weqesi yüz berdi

Pakistan paytexti islam'abadtiki qizil meschitte jüme küni yene partlash weqesi yüz bérip, az dégen 13 adem öldi. Pakistan hökümiti jüme küni qizil meschitning ibadetke échilidighanliqini jakarlighandin kéyin, mesichitni qoghdawatqan pakistan hökümet qisimliri bilen taliplar arisida toqunush yüz bérip, bir qanche kishi yarilan'ghan. Partlash weqesi yüz bérishtin burun kélip chiqqan toqunushta taliplar hökümet qisimlirigha tash atqan, hökümet qisimliri bolsa taliplargha yash aqquzush bombisi bilen qayturma zerbe bergen.

Xewerlerge qarighanda jüme namizi oqushqa kelgen musulmanlar hökümet terep teyinligen imamni meschittin qoghlap chiqirip, qizil meschidtiki toqunushta hökümet da'iriliri teripidin qolgha élin'ghan abdul'eziz ghazining qoyup bérilishini we uning meschitke imametchilik qilishini telep qilghan.

Abdul'eziz ghazining inisi abdulreshid ghazi pakistan armiyisi qizil meschitke bésip kirgende yüz bergen toqunushta ölgen idi. Meschidtiki partlash weqesini öz közi bilen körgüchilerning eskertishiche, partlash weqesi özini öltürüwélish xaraktérlik hujum bolup, hujumda köp qisimi saqchilarni asas qilghan 13 adem ölgen, 50 dek adem yarilan'ghan.

Qizil meschidtiki toqunush bu ayning bashliri mezkur meschidtiki taliplarning islam'abadtiki bir xitay pahishixanisigha hujum qilip, 7 neper xitayni görüge éliwélishidin bashlan'ghan idi. Xitay da'iriliri xitay puqralirini görüge tutquchilarni jazalashni telep qilghandin kéyin, prézidént musherrep qizil meschidtiki taliplargha hujum qilghan we meschitni tazilash herikitide az dégende 104 adem ölgen idi. (Erkin)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar