Америка һөкүмити хитайға қорал сатқанларни мәсулийәтчан болушқа чақирди


2004.12.17

Америка һөкүмитиниң баянатчиси скот макмилан җүмә күни вашнгтонда бәргән баянатида, америка һөкүмити исраилийә вә яврупа дөләтлирини хитайға қорал вә һәрбий техника сетиш мәсилисидә мәсулийәтчанлиқ билән һәрикәт қилишқа чақириду, диди.

Франсийә агентлиқиниң хәвәр қилишичә, америка мудапиә министирлиқиниң хитай билән исраилийә оттурисидики қорал содиси тоғрисида баян қилған әндишилири һәққидики бир соални җавапландурған макмилан, "биз узундин бири хитайға қорал вә һәрбий техника сетиш мәсилисидики әндишилиримизни тәкитләп келиватимиз. Дост вә иттипақдаш дөләтләр билән болған сөһбәтлиримиздә бу мәсилини йәнә оттуриға қойимиз" дәп көрсәтти.

Макмилан америка һөкүмити исраилийиниң 2000 - йили хитайға алдинала сигнал бериш радар системиси сетиш пиланидин ваз кәчкәнликини тәқдирләйду, диди.

Франсийә вә гирманийә қатарлиқ дөләтләр, 15 йил бурун хитайға қарита йолға қоюлған қорал имбаргосини бикар қилиш үчүн яврупа иттипақиға бесим ишләтмәктә.

Америка һөкүмитиниң баянатчиси макмилан, биз ниң мәқситимиз америка вә иттипақдаш күчләрниң һәмдә пуқраларниң бихәтәрликигә капаләтлик қилиштин ибарәт болуп исраилийә вә яврупа иттипақи дөләтлириниму бу асаслиқ мәсилидә бизгә охшаш чүшәнчигә игә дәп қараймиз. Шуниң үчүн улар ниң бу мәсилидә тоғра қарар алидиғанлиқиға ишинимиз, диди. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.