Amérika hökümiti xitaygha qoral satqanlarni mes'uliyetchan bolushqa chaqirdi

Amérika hökümitining bayanatchisi skot makmilan jüme küni washn'gtonda bergen bayanatida, amérika hökümiti isra'iliye we yawrupa döletlirini xitaygha qoral we herbiy téxnika sétish mesiliside mes'uliyetchanliq bilen heriket qilishqa chaqiridu, didi.

Fransiye agéntliqining xewer qilishiche, amérika mudapi'e ministirliqining xitay bilen isra'iliye otturisidiki qoral sodisi toghrisida bayan qilghan endishiliri heqqidiki bir so'alni jawaplandurghan makmilan, "biz uzundin biri xitaygha qoral we herbiy téxnika sétish mesilisidiki endishilirimizni tekitlep kéliwatimiz. Dost we ittipaqdash döletler bilen bolghan söhbetlirimizde bu mesilini yene otturigha qoyimiz" dep körsetti.

Makmilan amérika hökümiti isra'iliyining 2000 - yili xitaygha aldin'ala signal bérish radar sistémisi sétish pilanidin waz kechkenlikini teqdirleydu, didi.

Fransiye we girmaniye qatarliq döletler, 15 yil burun xitaygha qarita yolgha qoyulghan qoral imbargosini bikar qilish üchün yawrupa ittipaqigha bésim ishletmekte.

Amérika hökümitining bayanatchisi makmilan, biz ning meqsitimiz amérika we ittipaqdash küchlerning hemde puqralarning bixeterlikige kapaletlik qilishtin ibaret bolup isra'iliye we yawrupa ittipaqi döletlirinimu bu asasliq mesilide bizge oxshash chüshenchige ige dep qaraymiz. Shuning üchün ular ning bu mesilide toghra qarar alidighanliqigha ishinimiz, didi. (Qanat)