Русийидә тунҗи қетим қуш зукам вируси байқалди


2005.07.21

Уйғур аптоном райониниң чөчәк, санҗи вә чиңхәйдики тәбиий қоғдаш районлирида бу йил 4 вә 5 - айларда арқа - арқидин қуш зукам вируси байқалғандин кейин, пәйшәнбә күни русийә җидди һаләт министирлиқи русийиниң новей- сибириски областидики суздалка йезисида қуш зукам вируси байқалғанлиқини җакарлиди. Бу қуш зукам вирусиниң русийә чегриси ичидә тунҗи қетим байқилиши болуп һесаблиниду. Буниңдин сәл илгири японийә даирилири хитайдин импорт қилинған тоңлитилған ғаз гөшидә қуш зукам вируси байқиғанлиқини җакарлиған иди.

Русийә даирилириниң ашкарилишичә, суздалка йезисида йеқинқи бир қанчә күн ичидә 300 дин артуқ тоху вә өрдәк қуш зукам вирусида өлгән. Нөвәттә даириләр вирусниң тарқилишини контрол қилиш тәдбирлирини алған болсиму, әмма мутәхәссисләр һаваниң иссишиға әгишип, учар қушларниң шәрқий җәнубий асиядин русийигә көчүш хәвпи барлиқини агаһландурмақта.

Дуня сәһийә тәшкилати хитай даирилирини бу йил 4 - айда чиңхәй тәбиий қоғдаш районидики учар қушларда байқалған қуш зукам вирусиниң әтраптики дөләтләргә тарқилиш еһтимали барлиқи тоғрисида агаһландуруп, уйғур аптоном райониниң чөчәк вә санҗи шәһәрлиридә байқалған қуш зукам вируси үстидин тәкшүрүш елип беришкә рухсәт қилишни тәләп қилған. Бирақ дуня сәһийә тәшкилатиниң бейҗиңда турушлуқ вәкили вадийәниң чаршәнбә күни ашкарилишичә, хитай һөкүмити мәзкур органниң тәкшүрүш елип беришиға һазирғичә рухсәт қилмиған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.