ئامېرىكا پرېزىدېنتى جورجى بۇش سەيشەنبە كۈنى دۆلەت مەجلىسىدىن قۇش زۇكام ۋىرۇسى تىپىدىكى يۇقۇملۇق كېسەللەرگە قارشى مۇداپىئە تەدبىرى ئېلىش ئۈچۈن 7 مىليارد 100 مىليون دوللار تەستىقلاشنى تەلەپ قىلدى.
بۇش سەيشەنبە كۈنى ۋاشىنگتون ئەتراپىدىكى دۆلەتلىك سەھىيە تەتقىقات ئىنىستۇتىدا سۆزلىگەن نۇتۇقىدا، " دۆلىتىمىز ياكى دۇنيادا قۇش زۇكام ۋىرۇسىنىڭ پارتلاش ئەھۋالى تېخى كۆرۈلمىدى،" دەپ ئەسكەرتىش بىلەن بىرگە، "ئەمما بىز بۇنىڭ پارتىلشىنى كۈتۈپ ئولتۇرساق كېچىكىمىز،" دەپ كۆرسەتتى.
پرېزىدېنت بۇشنىڭ ئاگاھلاندۇرۇشىچە، قۇش زۇكام ۋىرۇسىنىڭ كەڭ كۆلەمدە تارقىلىشنى كەلتۈرۈپ چىقىرىدىغان بىشارەتلەر كۆرۈلمەكتە. ئۇ، بۇ ئەھۋال مىڭلىغان كىشىلەرنىڭ جېنىغا زامىن بولىدىغانلىقىنى تەكىتلىدى.
كانادا ھۆكۈمىتى ئۆتكەن ھەپتە كيۇبېك قاتارلىق ئۆلكىلەردىكى بەزى قۇشلاردا زۇكام ۋىرۇسىنىڭ بايقالغانلىقىنى ئېلان قىلغان. ئەمما دائىرىلەر بۇ ۋىرۇسىنىڭ خىتاي قاتارلىق دۆلەتلەردە بايقالغان قۇش زۇكام ۋىرۇسى بىلەن قانداق مۇناسۋىتى بارلىقىنى تېخى ئېنىقلامىدى.
زۇكام زۇكام ۋىرۇسى بۇ يىل 4 - ئايدا خىتاينىڭ چىڭخەي كۆلىدىكى ياۋا قۇشلاردا بايقالغاندىن كېيىن، ئۇزۇن ئۆتمەيلا ئۇيغۇر ئاپتونوم رايونىنىڭ چۆچەك ۋە سانجى قاتارلىق جايلىرىدىكى ئۆي قۇشلىرىدا تېپىلغان. خىتاي دائىرىلىرى دۇنيا سەھىيە تەشكىلاتىنىڭ چىڭخەيدە تەكشۈرۈش ئېلىپ بېرىشىغا يول قويغان بولسىمۇ، ئەمما ئۇلارنىڭ چۆچەك بىلەن سانجىدا تەكشۈرۈش ئېلىپ بېرىش تەلىپى رەت قىلىندى.
دۈشەنبە كۈنى "شاڭخەي مالىيە - ئىقتىساد گېزىتى" ماقالە ئېلان قىلىپ، خىتاي دائىرىلىرىنى قۇش زۇكام ۋىرۇسى ھەققىدە تەمىنلىگەن ئۇچۇرى كونكرېت ئەمەس، دەپ تەنقىدلىگەن. (ئەركىن)