Prézidént bush dölet mejlisining qush zukam wirusigha qarshi meblegh ajritishini telep ‎qildi

Amérika prézidénti jorji bush seyshenbe küni dölet mejlisidin qush zukam wirusi tipidiki ‎yuqumluq késellerge qarshi mudapi'e tedbiri élish üchün 7 milyard 100 milyon dollar ‎testiqlashni telep qildi. ‎

Bush seyshenbe küni washin'gton etrapidiki döletlik sehiye tetqiqat inistutida sözligen ‎nutuqida, " dölitimiz yaki dunyada qush zukam wirusining partlash ehwali téxi ‎körülmidi," dep eskertish bilen birge, "emma biz buning partilshini kütüp oltursaq ‎kéchikimiz," dep körsetti. ‎

Prézidént bushning agahlandurushiche, qush zukam wirusining keng kölemde tarqilishni ‎keltürüp chiqiridighan bisharetler körülmekte. U, bu ehwal minglighan kishilerning ‎jénigha zamin bolidighanliqini tekitlidi. ‎

Kanada hökümiti ötken hepte kyubék qatarliq ölkilerdiki bezi qushlarda zukam ‎wirusining bayqalghanliqini élan qilghan. Emma da'iriler bu wirusining xitay qatarliq ‎döletlerde bayqalghan qush zukam wirusi bilen qandaq munaswiti barliqini téxi ‎éniqlamidi. ‎

Zukam zukam wirusi bu yil 4 - ayda xitayning chingxey kölidiki yawa qushlarda ‎bayqalghandin kéyin, uzun ötmeyla Uyghur aptonom rayonining chöchek we sanji ‎qatarliq jayliridiki öy qushlirida tépilghan. Xitay da'iriliri dunya sehiye teshkilatining ‎chingxeyde tekshürüsh élip bérishigha yol qoyghan bolsimu, emma ularning chöchek ‎bilen sanjida tekshürüsh élip bérish telipi ret qilindi. ‎

Düshenbe küni "shangxey maliye - iqtisad géziti" maqale élan qilip, xitay da'irilirini qush ‎zukam wirusi heqqide teminligen uchuri konkrét emes, dep tenqidligen. (Erkin)‎