Qush zukimi késelliki türkiyide kéngeymekte

9‏-Yanwar küni türkiye sehiye minsitirliqi xadimliri, türkiyining sherqiy rayonida bayqalghan qush zukimi késellikining bu döletning gherbiy rayonliridimu otturigha chiqqanliqini bildürdi.

Xewerlerge qarighanda, türkiyining eng muhim soda we tijaret merkizi hemde asiyani yawropagha baghlaydighan asasliq port hésablan'ghan istanbul shehiride 23 kishi qush zukimi wirusi bilen yuqumlan'ghan dégen guman bilen doxturxanigha yatquzulghan bolup, ularning 13 i kichik balilar iken.

Türkiye sehiye ministirliqi xadimliri, türkiyining paytexti enqere shehiri etrapidiki yézilarda élip bérilghan tekshürüshlerde üch kishide qush zukimi wirusining bayqalghanliqini bildürmekte.

Qush zukimi késellikining yawropaning ishiki dep atalghan 12 milyon nopusqa ige istanbul shehiride otturigha chiqishi nurghunlighan kishilerni endishige salmaqta. Chünki bu késellikning istanbulda otturigha chiqishi, mezkur wirusning yawropagha tarqilip, chong bir apetke aylinip kétish éhtimalliqini peyda qilmaqta.

Ötken hepte türkiyining sherqiy rayonida bir a'ilining üch balisi qush zukimi késelliki sewebidin ölgen idi. (Qanat)