Xelq'ara qush zukam wirusi i'ane toplash yighini béyjingda échildi

Qush zukam wirusigha qarshi turush boyiche xelq'ara i'ane toplash yighini seyshenbe küni béyjingda bashlandi. Dunya bankisining eskertishiche, qush zukam wirusini bir terep qilish we uning insanlar arisida tarqilishidin saqlinish üchün kelgüsi 3 yilda bir milyard 500 milyon dollargha éhtiyaj chüshidu.

Qush zukam wirusida hazirgha qeder dunya boyiche 2003 - yildin béri 79 adem öldi. Bu qétim yighin zukam wirusigha qarshi turush tedbirliri élishqa i'ane toplashni meqset qilghan. Terepler i'anining közlen'gen sandin éship kétishini ümid qilmaqta. Yawropa ittipaqi 121 milyon dollar i'ane béridighanliqini jakarlighan. Dunya sehiye teshkilatining emeldari margarét chenning tekitlishiche, i'ane pullar qush zukam wirusining tehditige uchrighan namrat döletlerdiki ölüm ‏- yitimni azaytish, wirusning kéngiyishini tizginleshke ishlitilidiken.

Dunya bankisi, i'ane pulning 45 % wéytnam, hindonéziye, kambodzha, tayland we la'us qatarliq döletlerge ishlitidighanliqini bildürdi.

Xitay qush zukam wirusi eng köp bayqalghan döletlerning biri. Xitay da'irilirining seyshenbe küni ashkarilishiche, 2005 - yili xitay boyiche 32 yerde qush zukam wirusi bayqalghan bolup, 22 yérim milyon uchar qush mezkur wirus sewebidin öltürülgen. Uyghur aptonom rayoni ötken yili xitay boyiche qush zukam wirusi eng köp bayqalghan rayon bolup qaldi. (Erkin)