Amérikining xitayni tenqid qilish layihisidin waz kechkenliki kishilik hoquq organlirining tenqidige uchridi


2005.03.18
Share on WhatsApp
Share on WhatsApp

Amérika hökümitining jenwede échilidighan b d t yighinida xitay kishilik hoquq xatirisini tenqid qilish layihisi otturigha qoyushtin waz kechkenliki, kishilik hoquqni közütüsh teshkilati qatarliq xelq'ara kishilik organlirining tenqidige uchridi.

Merkizi nyo - yorktiki xelq'ara kishilik hoquqni közütüsh teshkilati jüme küni bayanat élan qilip, ataghliq kishilik hoquq pa'aliyetchisi rabiye qadirning qoyup bérilgenlikidin xoshal bolghanliqini bildürdi. Amma bu rabiye qadirni bir qanche yil türmige solighan xitay hökümitining siyasi netijisi bolup qalmasliqi kérek, dep körsetti. Kishilik hoquqni közütüsh teshkilatining bildürüshiche, xitay hökümiti her yili xelq'ara chong weqelerning aldida bezi ataghliq siyasi mehbuslarni qoyup bérip , xelq'ara jem'iyetning tenqidige uchrashtin özini qachurup kelmektiken.

Kishilik hoquq közütüsh teshkilati, rabiye qadirni qoyup bérish buning tipik misali, dep tekitlidi. Xelq'ara kishilik hoquq közütüsh teshkilatining bildürüshiche, b d t kishilik hoquq komitétitining yighinida birer dölet otturigha chiqip, xitay hökümitining kishilik hoquqqa hörmet qilmaywatqanliqidin ibaret bu ri'alliqni tenqid qilmisa, bu xelq'ara jem'iyetning meghlubiyiti bolidu , dep körsetti.

Shu küni, merkizi londondiki xelq'ara kechürüm teshkilati, béyjing da'irilirini xitay türmisidiki siyasi mehbuslarni xelq'ara jem'iyet bilen sodilishidighan siyasi kozurgha aylandurwélish bilen eyiplidi. Amérika hökümiti aldinqi küni b d t kishilik hoquq komitétitining bu yilqi jenwe yighinida xitayni tenqid qilish lahiyisi sunmaydighanliqini jakarlidi. Amérika bu qararni rabiye qadir qoyup bérilishning bir qanche sa'et aldida élan qilghan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.