Көп қисим америкилиқлар хитайни йәнила тәһдид һесаблайдикән

Америкида йеқинда елип берилған бир қетимлиқ хәлқ райини синашниң нәтиҗисидин ашкарилинишичә, гәрчә америкилиқларниң хитайға болған қариши илгирикидин яхшиланған болсиму, ٪ 60 америкилиқ йәнила хитайни йошурун иқтисадий вә һәрбий тәһдид дәп қарайдикән.

Америка бирләшмә ахбарат агентлиқиниң билдүрүшичә, бу қетимлиқ райи синаш, мәркизи нйо- йорктики тәшкилат "йүз кишилик комитет" ниң тәшәббуси билән елип берилған. Улар он йил бурунму охшаш түрдики райи синашни елип барған.

"Йүз кишилик комитет" ниң пәйшәнбә күни ашкарилишичә, көп қисим америкилиқлар хитайниң базар игилики йолиға қарап маңғанлиқи вә барғансири иқтисадий күчлүк бир дөләткә айлиниватқанлиқиға иҗабий қарайдикән. Бирақ хитайниң кишилик һоқоқ хатириси йәнила америкилиқлар әң әндишә қилидиған мәсилә болуп,٪ 70 америкилиқлар хитайниң кишилик һоқуқ мәсилисини хитай маллириниң америка базириға кириш- кирмәсликигә бағлаш керәк дәп ойлайдикән.

Буниңдин сирт,٪ 60 америкилиқлар, америкидики иш пурситиниң хитайға еқип кетиватқанлиқидин вә хитайниң дуня екологийисигә елип келидиған бузғунчилиқлиридин әндишә қилидикән. (Арзу)