Америка ташқи ишлар министири оттура шәрқ зияритини башлиди


2005-02-06
Share

Америкиниң йеңидин тәйинләнгән ташқи ишлар министири кондилиза райис оттура шәрқ тинчлиқини илгири сүрүш үчүн, йәкшәнбә күни исраилийигә йитип кәлди.

У йәкшәнбә күни кәчтә йерусалемда исраилийә баш министири ариял шарон билән көрүшкәндин кийин, дүшәнбә күни рамаллаға берип, пәләстин рәһбири мәхмуд аббас билән сөһбәт өткүзиду.

Америка ташқи ишлар министири кондилиза райисниң зиярити дәл сәйшәнбә күни мисирда өткүзүлидиған исраилийә вә пәләстин рәһбәрлириниң йиғининиң һарписиға тоғра кәлгән. Америка гәрчә бу йиғинға қатнашмисиму, бирақ буш һөкүмити исраилийә вә пәләстинниң оттура шәрқи тинчлиқини әмәлгә ашуруш йолидики барлиқ тиришчанлиқлирини қоллайдиғанлиқини көрсәткән иди.

Кондилиза райис оттура шәрққә йитип келиштин илгири түркийә вә әнгилийини зиярәт қилған. Униң бу зиярәтлири америкиниң яврупа бирлики билән болған мунасивитини мустәһкәмләш дәп қаралмақта.

Ройтирс агентлиқиниң йәкшәнбә күни бәргән хәвиригә қариғанда, кондилиза райис лондондики зияритидә, яврупа бирликиниң хитайға қаратқан қорал сетип бәрмәслик чәклимисини бикар қилишиқа қошулмайдиғанлиқини қайта тәкитлигән. яврупа бирлики 1989 - йили тйәнәнмин вәқәсидин кийин, хитайға қорал чәклимисини йүргүзгән болуп, бирақ йеқинда буни бикар қилиштин бишарәт бәрмәктә иди. Әмма кондилиза райис, қорал чәклимиси бикар қилинғанда, шәрқий асияниң һәрбий тәңпуңлиқи бузулуп кетиши мумкинликини билдүрүп, яврупа бирликини хитайға хата сигнал бәрмәсликкә чақирған. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт