Amérika tashqi ishlar ministiri ottura sherq ziyaritini bashlidi


2005-02-06
Share

Amérikining yéngidin teyinlen'gen tashqi ishlar ministiri kondiliza rayis ottura sherq tinchliqini ilgiri sürüsh üchün, yekshenbe küni isra'iliyige yitip keldi.

U yekshenbe küni kechte yérusalémda isra'iliye bash ministiri ariyal sharon bilen körüshkendin kiyin, düshenbe küni ramallagha bérip, pelestin rehbiri mexmud abbas bilen söhbet ötküzidu.

Amérika tashqi ishlar ministiri kondiliza rayisning ziyariti del seyshenbe küni misirda ötküzülidighan isra'iliye we pelestin rehberlirining yighinining harpisigha toghra kelgen. Amérika gerche bu yighin'gha qatnashmisimu, biraq bush hökümiti isra'iliye we pelestinning ottura sherqi tinchliqini emelge ashurush yolidiki barliq tirishchanliqlirini qollaydighanliqini körsetken idi.

Kondiliza rayis ottura sherqqe yitip kélishtin ilgiri türkiye we en'giliyini ziyaret qilghan. Uning bu ziyaretliri amérikining yawrupa birliki bilen bolghan munasiwitini mustehkemlesh dep qaralmaqta.

Roytirs agéntliqining yekshenbe küni bergen xewirige qarighanda, kondiliza rayis londondiki ziyaritide, yawrupa birlikining xitaygha qaratqan qoral sétip bermeslik cheklimisini bikar qilishiqa qoshulmaydighanliqini qayta tekitligen. Yawrupa birliki 1989 - yili tyen'enmin weqesidin kiyin, xitaygha qoral cheklimisini yürgüzgen bolup, biraq yéqinda buni bikar qilishtin bisharet bermekte idi. Emma kondiliza rayis, qoral cheklimisi bikar qilin'ghanda, sherqiy asiyaning herbiy tengpungliqi buzulup kétishi mumkinlikini bildürüp, yawrupa birlikini xitaygha xata signal bermeslikke chaqirghan. (Arzu)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet