Kondiliza rayis xitayni kishilik hoquqni yaxshilashqa chaqirdi

Amérika tashqi ishlar ministiri kondiliza rayis düshenbe küni xitaydiki ziyaritini axirlashturup, amérikigha qarap yolgha chiqti.

Amérika birleshme axbarat agéntliqining xewirige qarighanda, kondiliza rayis xitaydiki ziyaritide xitay rehberliri bilen körüshüp, xitay rehberlirini kishilik hoquqni ilgiri sürüshke , bolupmu puqralarning diniy erkinlikige hörmet qilishqa chaqirghan.

Kondiliza rayis "men xitayning shuni chüshinishini ümid qilimenki, din jem'iyetke tehdid élip kelmeydu. Eksinche, jem'iyet muqimliqini saqlash we méhir- muhebbet tarqitish jehetlerde ijabiy rol oynaydu" dédi.

Xewerge qarighanda, kishilik hoquq mesilisidin sirt, amérika tashqi ishlar ministiri kondiliza rayis yene, teywen mesiliside toxtilip, amérikining bir xitay prinsipini qayta tekitlidi. Biraq u yene, xitayning yéngidin qarar qilghan "döletni parchilashqa qarshi qanun" ning teywen boghizidiki weziyetni jiddileshtürgenlikini bildürdi. U béyjingni teywen bilen bolghan jiddi munasiwetni yaxshilashqa chaqirdi.

Buningdin sirt, kondiliza rayis yene shimaliy koriye mesiliside, amérikining meydanini izahlap, eger shimaliy koriye hemkarlishishni dawamliq ret qilsa, amérikining bashqa yollar arqiliq shimaliy koriye yadro mesilisini hel qilidighanliqini körsetti. Biraq u yene, bashqa yollarning herbiy heriketni közde tutmaydighanliqini bildürdi.

Bu arida, amérika emeldarlirining düshenbe küni ashkarilishiche, amérika prézidénti jorj bush, xitay dölet re'isi xujintawni bu yilning kiyinki yérimida amérikini ziyaret qilishqa teklip qilghan. Xujintaw 2002 - yili mu'awin dölet re'islik salahiyiti bilen amérikini ziyaret qilghan idi. (Arzu)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar