Amérika tashqi ishlar ministiri rayis pat yéqinda xitayni ziyaret qilidu

Amérika tashqi ishlar ministiri kondiliza rayis jüme küni xitayni ziyaret qilip, shimaliy koriye yadro qorallar mesilisi boyiche söhbet élip baridu. Xitay, rayisning bu qétimqi asiya sepirining tunji békiti bolup, u jenubiy koriye, yaponiye we taylandlarni ziyaret qilidu.

Amérika tashqi ishlar ministirliqining seyshenbe küni ashkarilishiche, shimaliy koriye yadro qorallar mesilisi we 6 dölet söhbiti rayisning sherqiy asiya sepiridiki asasi téma hésablinidiken. U, 9 - iyulda béyjinggha baridu. Biraq bu arida xitay hökümiti rayisning ziyariti toghrisida amérika bilen sözlishiwatqanliqini bildürdi. Xitay tashqi ishlar ministirliqining bayanatchisi lyu jyenchaw seyshenbe küni " jonggo bilen amérika bu mesilini sözlishiwatidu shundaqla orunlashturush élip bériwatidu," dep körsetti. Emma amérika tashqi ishlar ministirliqi rayis 9 - 10 - iyunlarda béyjingni ziyaret qilidighanliqini élan qildi.

Fransiye axbarat agéntliqining xewer qilishiche, rayis béyjingda xitay tashqi ishlar ministiri li jawshing qatarliq yuqiri derijilik rehberler bilen uchrushidiken. Rayisning ziyariti, amérika soda ministiri charlos guttiriz, amérika soda wekili rob portman, yéza igilik ministiri mayik johanis qatarliqlarning ishtirakidiki xitay amérika soda komitétitining yighini harpisigha toghra kelmekte. Portman bilen johanis, 12 we 13 - iyullarda dunya soda teshkilatining dalandiki ministirlar yighinigha qatnishidu. (Erkin)