Kondoliza rays pakistanni ziyaret qildi

Amérika tashqi ishlar ministiri kondoliza rays charshenbe küni pakistan'gha ziyaretke kélip, yer tewresh apitige uchrighan rayondiki xelqlerdin hal soridi. Shundaqla u yene apet rayonigha uzun muddetlik yardem bérishke wede qildi hemde amérika qilidighan yardemning 50 milyondin ashidighanliqini aldin mölcherlidi.

Pakistanda shenbe küni yüz bergen 7.6 Bal yer tewresh pakistan'gha qarashliq keshmir rayonidila 20 mingdin oshuq kishining jénigha zamin bolghan bolup, amérika hökümiti pakistan'gha dawalash jehette yardem béripla qalmastin, yene tik uchar we herbiy transport ayropilanlirini pakistan'gha ewetti.

Kondoliza rays pakistan'gha kélishtin burun, tajikistan, qazaqistan we afghanistanlarda ziyarette boldi. U afghanistandiki mezgilide, afghanistan omumiy saylimini medhiylidi hemde afghanistandiki amérika qoshunini, térrorchilarni meghlup qilghiche, bu yerde dawamliq turghuzidighanliqini bildürdi.

Rays afghanistan'gha kélishtin sel awal, kabulda ikki qétim top zembirek hujumi yüz bérip, buning arisidiki biri bu yerdiki kanada elchixanisining etrapida partlighan hemde afghanistanliq ikki neper amanliq qoghdighuchi xadimi yarilan'ghan idi. Buningdin sirt charshenbe küni ettigen, taliban qoralliq küchliri qendeharda, tibbiy yardem sépidiki 5 neper afghan xadimini étip öltürgen. (Peride)