Кондилиза райис оттура асия зияритини ахирлаштурди


2005-10-13
Share

Америка ташқи ишлар министири кондилиза райис пәйшәнбә күни америка һөкүмитиниң оттура асия җумһурийәтлири арисида демократийини илгири сүрүшни тәкитләватқанлиқини билдүрди.

Кондилиза райис бу сөзни таҗикистанниң диктатор президенти имамәли рахманоф билән дүшәнбидә учрашқандин кейин ейтқан. У сөзидә "оттура асия райониниң демократийә тарихи йоқ. Шуңа бу дөләтләрдә илгириләшләрни қолға кәлтүрүш әң муһим мәсилә" деди.

Кондилиза райис пәйшәнбә күни таҗикистанға келиштин бурун, қазақистанни зиярәт қилған иди. У қазақистан президенти нурсултан нәзәрбайеф билән көрүшкәндин кейинки мухбирларни күтүвелиш йиғинида, америкиниң мәйли оттура асия боламду яки оттура шәрқтә боламду бирдәк демократийидин ибарәт учурни тәкитләйдиғанлиқини ейтти.

Буниң алдида, қазақистандики өктичиләр, америкини демократийини әмәс, бәлки нефит вә һәрбий мәнпәәтлирини алдинқи орунға қойди дәп әйиблигән иди. Улар қазақистан даирилириниң декабирдики президент сайлими һарписида, өктичи партийиниң президент намзатиниң сайлам паалийәтлирини йүрүштүриватқан тохтисунофни қолға алғанлиқи һәққидә кондилиза райисниң очуқ ипадә билдүрмигәнликидин үмидсизләнгәнликини билдүргән.

Әмма кондилиза райис буни рәт қилип," биз һәргизму нефит вә һәрбий мәнпәәтләрниң бизниң әркинликни қоғдаш нишанимизға тосқунлуқ қилишиға йол қоймаймиз" деди.

Кондилиза райис дүшәнбә күни оттура асиядики төт дөләткә қаратқан төт күнлүк сәпирини башлиған иди. Ройтирс агентлиқиниң хәвиридә ейтилишичә, кондилиза райис бу сәпиридә оттура асиядики диктаторларни өзидин қачуруп қоймаслиқ билән демократийини илгири сүрүшни тәңпуңлаштурушқа тиришқан. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт