Kondiliza rayis ottura asiya ziyaritini axirlashturdi

Amérika tashqi ishlar ministiri kondiliza rayis peyshenbe küni amérika hökümitining ottura asiya jumhuriyetliri arisida démokratiyini ilgiri sürüshni tekitlewatqanliqini bildürdi.

Kondiliza rayis bu sözni tajikistanning diktator prézidénti imam'eli raxmanof bilen düshenbide uchrashqandin kéyin éytqan. U sözide "ottura asiya rayonining démokratiye tarixi yoq. Shunga bu döletlerde ilgirileshlerni qolgha keltürüsh eng muhim mesile" dédi.

Kondiliza rayis peyshenbe küni tajikistan'gha kélishtin burun, qazaqistanni ziyaret qilghan idi. U qazaqistan prézidénti nursultan nezerbayéf bilen körüshkendin kéyinki muxbirlarni kütüwélish yighinida, amérikining meyli ottura asiya bolamdu yaki ottura sherqte bolamdu birdek démokratiyidin ibaret uchurni tekitleydighanliqini éytti.

Buning aldida, qazaqistandiki öktichiler, amérikini démokratiyini emes, belki néfit we herbiy menpe'etlirini aldinqi orun'gha qoydi dep eyibligen idi. Ular qazaqistan da'irilirining dékabirdiki prézidént saylimi harpisida, öktichi partiyining prézidént namzatining saylam pa'aliyetlirini yürüshtüriwatqan toxtisunofni qolgha alghanliqi heqqide kondiliza rayisning ochuq ipade bildürmigenlikidin ümidsizlen'genlikini bildürgen.

Emma kondiliza rayis buni ret qilip," biz hergizmu néfit we herbiy menpe'etlerning bizning erkinlikni qoghdash nishanimizgha tosqunluq qilishigha yol qoymaymiz" dédi.

Kondiliza rayis düshenbe küni ottura asiyadiki töt döletke qaratqan töt künlük sepirini bashlighan idi. Roytirs agéntliqining xewiride éytilishiche, kondiliza rayis bu sepiride ottura asiyadiki diktatorlarni özidin qachurup qoymasliq bilen démokratiyini ilgiri sürüshni tengpunglashturushqa tirishqan. (Arzu)