Rayis béyjingda kishilik hoquq mesilisini otturigha qoydi

Amérika tashqi ishlar ministiri kondilza rayis béyjingda kishilik hoquq mesilisini otturigha qoydi. Lékin xitay tashqi ishlar ministiri li jawshing amérikining özide kishilik hoquq mesilisi mewjut, dep jawab bergen.

Kondiliza rayisning jüme küni li jawshing bilen birge ötküzgen muxbirlarni kütüwélish yighinida eskertishiche,u xitay rehberliri bilen shimaliy koriye yadro mesilisini muzakire qilghandin sirt, xitay kishilik hoquq xatirisi we kishilik hoquqqa munasiwetlik bezi shexsi délolar üstide toxtalghan. Her ikkila terep bu shexsi délolarning kimler bilen munasiwetlik ikenlikini tilgha almidi.

Lékin roytérs axbarat agéntliqining ilgiri sürüshiche, rayis, nyu - york waqti gézitining béyjingda turushluq tetqiqatchisi jaw yen we xitay démokratiye pa'aliyetchisi yang jyenlilarning mesilisini otturigha qoyghan bolushi mumkin. Nöwette bu kishiler xitay türmiside yatmaqta.

Uyghur kishilik hoquqi herikitining rehbiri rabiye qadirning türmidiki perzentliri amérika hökümitining tizimlikidiki muhim délolar hésablansimu, lékin ularning mesilisi bu qétim otturigha qoyulghan yaki qoyulmighanliqi hazirche melum emes.

Rayis, amérika bilen xitayning bu mesililerni kelgüside dawamliq muzakire qilidighanliqini bildürdi. Li jawshingning eskertishiche, umu rayisqa 2 neper xitay puqrasining amérikidiki kishilik hoquq mesilisige da'ir tizimlikini tapshurghan. U, xitayning amérika bilen kishilik hoquq söhbiti élip bérishqa teyyar ikenlikini bildürdi. (Erkin)