Америка җәнубий корийиниң пйоңяңни електир билән тәминләш пиланини қарши алди

Америка ташқи ишлар министири кондилиза райис җәнубий корийиниң шималий корийини һәқсиз електир билән тәминләш пиланини қарши алди. Әмма райис пйоңяңни агаһландуруп, шималий корийә ядро қораллар пиланидин пүтүнләй ваз кечиши керәк, дәп тәкитлигән. Шималий корийә йеқинда бу айниң ахирлириғичә ядро қораллар сөһбәт үстилигә қайтип келидиғанлиқини җакарлиған иди.

Кондилиза райис, чаршәнбә күни сийолда мухбирларни күтүвелип, шималий корийә електир енергийисигә еһтияҗ, әмма у ядро қораллар пиланидин ваз кечиши керәк, дәп көрсәтти.

Райисниң тәкитлишичә, америка шимали корийини сөһбәт үстилигә қайтуруп келиш үчүн шималий корийигә нәп бәрмигән. У, америкиниң мәйданида өзгириш болмиғанлиқини билдүрди.

Бу арида чаршәнбә күни хитай дөләт комисари таң җяшүән пйоңяңни зиярәт қилип, шималий корийә рәһбири ким җуңил билән сөһбәт елип барди.

Шинхуа ахбарат агентлиқиниң хәвәр қилишичә, ким җуңил, шималий корийиниң мәқсиди корийә йерим арилини ядросизлаштуруш, дәп тәкитлигән. Тәрәпләр шималий корийә ядро қораллар мәсилиси бойичә 6 дөләт сөһбитиниң 25 - июлда башлинишини үмид қилмақта. Сөһбәт һазирға қәдәр хитай һөкүмитиниң саһипханлиқида елип берилди. (Әркин)