Рим папаси мурасимға келәлмигән хитай епископиға салам йоллиди

• 
  2005-10-23

Ватиканда рим католик дини баш епископлар йиғиниға қатнишиватқан рим папаси бенедикт XVI хитай һөкүмити тәрипидин мәзкур йиғинға кәлтүрүлмигән 4 нәпәр хитай баш епископиға алаһидә салам йоллиди. Буниң билән бир вақитта йәнә, дуняниң һәр қайси җайлиридин кәлгән баш епископларму йиғинға қатнишалмиған хитай епископлириға хәт йоллап салимини вә қайғусини ипадиләп, ватикан билән хитай оттурисидики мунасивәтниң тезрақ әслигә келишини үмид қилидиғанлиқини билдүрди.

Рим папаси бу 4 нәпәр хитай баш епископини 10 -айниң 2 -күнидин 23 - күнигичә давамлишидиған мәзкур йиғинға қатнишишқа тәклип қилған болсиму, лекин хитай һөкүмитиниң тосқунлиқи билән уларниң сәпири тохтап қалған иди. Хитай даирилири илгири, тәйвән мәсилисиниң буниңға тосқунлуқ қилған асаслиқ амил икәнликини әскәрткән.

Бу 4 нәпәр хитай баш епископиниң арисидики бири рим папасиға хәт йезип, өзиниң бу йиғинға қатнишалмиғанлиқидин толиму әпсусланғанлиқини һәмдә ватикан билән хитай оттурисидики мунасивәтниң әслигә келишини үмид қилидиғанлиқини билдүргән.

Ватикан 1950 - йиллири хитайниң католик диний муритлирини хитайдин қоғлап чиқарғанлиқи сәвәбидин хитай билән болған депломатик мунасивәтни үзгән иди. Хитай даирилири әгәр ватикан тәйвәнни етирап қилмай "бир җуңго"сияситини яқлиса, у чағда хитайниң ватикан билән мунасивәтни әслигә кәлтүрүшни халайдиғанлиқини тәкитлиди.

Бу қетимлиқ йиғинға дунядики 118 дөләттин 250 кә йеқин баш епископ келип қатнашқан болуп, тәйвәндинму икки нәпәр баш епископ кәлгән. (Пәридә)