Rim papasi murasimgha kélelmigen xitay épiskopigha salam yollidi

• 
  2005-10-23

Watikanda rim katolik dini bash épiskoplar yighinigha qatnishiwatqan rim papasi bénédikt XVI xitay hökümiti teripidin mezkur yighin'gha keltürülmigen 4 neper xitay bash épiskopigha alahide salam yollidi. Buning bilen bir waqitta yene, dunyaning her qaysi jayliridin kelgen bash épiskoplarmu yighin'gha qatnishalmighan xitay épiskoplirigha xet yollap salimini we qayghusini ipadilep, watikan bilen xitay otturisidiki munasiwetning tézraq eslige kélishini ümid qilidighanliqini bildürdi.

Rim papasi bu 4 neper xitay bash épiskopini 10 -ayning 2 -künidin 23 - künigiche dawamlishidighan mezkur yighin'gha qatnishishqa teklip qilghan bolsimu, lékin xitay hökümitining tosqunliqi bilen ularning sepiri toxtap qalghan idi. Xitay da'iriliri ilgiri, teywen mesilisining buninggha tosqunluq qilghan asasliq amil ikenlikini eskertken.

Bu 4 neper xitay bash épiskopining arisidiki biri rim papasigha xet yézip, özining bu yighin'gha qatnishalmighanliqidin tolimu epsuslan'ghanliqini hemde watikan bilen xitay otturisidiki munasiwetning eslige kélishini ümid qilidighanliqini bildürgen.

Watikan 1950 - yilliri xitayning katolik diniy muritlirini xitaydin qoghlap chiqarghanliqi sewebidin xitay bilen bolghan déplomatik munasiwetni üzgen idi. Xitay da'iriliri eger watikan teywenni étirap qilmay "bir junggo"siyasitini yaqlisa, u chaghda xitayning watikan bilen munasiwetni eslige keltürüshni xalaydighanliqini tekitlidi.

Bu qétimliq yighin'gha dunyadiki 118 dölettin 250 ke yéqin bash épiskop kélip qatnashqan bolup, teywendinmu ikki neper bash épiskop kelgen. (Peride)