Amérika awam palata ezaliri amérikining xitaygha qarshi alem boshluqi riqabet küchini kücheytishke chaqirdi

Amérika dölet mejlisi awam palata ezaliri yéqinda prézidént bushqa xet yézip, amérika hökümitini xitayning alem boshluqi riqabet küchige qarshi tedbir élishqa chaqirdi.

Xewerlerge qarighanda bu xet, xitay herbiy da'irilirining 11 - yanwar küni alem boshluqida sün'iy hemrahgha qarshi bashqurulidighan bomba siniqi élip barghanliqigha qaritip yézilghan bolup, xette xitaylar yéqinda élip barghan bu sinaq alem boshluqini herbiyleshtürüsh dewrining yétip kelgenlikidin bisharet bermekte, déyilgen.

Birleshme axbarat agéntliqining eskertishiche, bu xet jumhuriyetchi awam palata ezaliri xuntér, éwéritlar teripidin yézilghan. Dankun xuntér, xitayning amérika alem boshluqi eslihelirige zerbe bérish iqtidarini sinap baqqanliqini bildürdi we yawropa ellirini xitaygha sün'iy hemrah we alem boshluqi téxnikisi sétip bermeslikke chaqirdi.

Xitayning 11 - yanwarda élip barghan alem boshluqi bashqurulidighan bomba siniqi amérika dölet mejlisi we herbiy da'irilirining diqqitini qozghimay qalmidi. Amérika dölet mudapi'e ministirliqidiki emeldarlar amérikining alem boshluqi eslihelirini qoghdash iqtidari küchlük, dep tekitlisimu, lékin yenila xitayning bu qétimqi alem boshluqi herbiy siniqini eyiblimekte.

Birleshme axbarat agéntliqining xewer qilishiche, xitay hökümiti peyshenbe küni bashqa döletler bilen alem boshluqida herbiy hazirliqlar musabiqisi élip bérishni cheklesh kélishimi imzalashni xalaydighanliqini bildürgen. (Erkin)