Кондализа райис асия - тинч окян дөләтлиридики зияритидә хитай мәсилисини музакирә қилиши мүмкин

Австралийә ташқий ишлар министирлиқиниң ашкарилишичә, америка ташқий ишлар министири кондализа райис пәйшәнбә күни асия - тинч окян дөләтлиригә қилған сәпириниң муһим бекити австралийини зиярәт қилғанда, хитай мәсилиси униң зиярәт күнтәртипидики музакирә темилириниң бири болуп қелиши мүмкин.

Бирләшмә ахбарат агентлиқи, австралийә ташқий ишлар министири александир довнерниң " бейҗиңниң йүксиливатқан тәсирини хәлқара ишларда мәсулийәтчанлиқ билән қоллиниши наһайити муһим " дәп тәкитлигәнликини хәвәр қилди. Довнерниң әскәртишичә, америка билән австралийә хитайниң иҗабий һәмкарлиқини үмид қилидикән. Райис алдимиздики пәйшәнбә күни австралийигә йетип бариду.

японийә райисниң бу сәпиридики йәнә бир зиярәт бекити. У, японийини зиярәт қилғанда хитайниң һәрбий тәрәққият әһвалини музакирә қилидикән. Шуниң билән биргә райис сәйшәнбә күни һиндонезийини зиярәт қилғанда террор, хамас вә оттура шәрқ мәсилилирини музакирә қилиду. Ғәрб дөләтлири хәлқара мәсилиләрдә хитайниң мәсулийәтчан рол ойнишини үмид қилмақта. Әмма хитай һөкүмити бейҗиңда ечиливатқан хәлқ қурултийи йиғинида җуңгониң бу йилқи һәрбий хам чотини 14 пирсәнт өстүрди.

Америка билән японийә хитай һәрбий күчи униң бихәтәрлики үчүн зөрүр болған сәвийидин ешип кәткәнликини билдүрмәктә. Бирләшмә ахбарат агентлиқиниң хәвәр қилишичә, александир довнер " хитайниң баш көтириш мәсилисидә биз америкилиқлар билән охшаш тонушқа игә. Биз қаршилишиш сияситини халимаймиз " дәйду. У, " биз һәмкарлиқни қоғлишимиз " дәп тәкитлигән. (Әркин)