Kondaliza rayis asiya - tinch okyan döletliridiki ziyaritide xitay mesilisini muzakire qilishi mümkin

• 
  2006-03-13

Awstraliye tashqiy ishlar ministirliqining ashkarilishiche, amérika tashqiy ishlar ministiri kondaliza rayis peyshenbe küni asiya - tinch okyan döletlirige qilghan sepirining muhim békiti awstraliyini ziyaret qilghanda, xitay mesilisi uning ziyaret küntertipidiki muzakire témilirining biri bolup qélishi mümkin.

Birleshme axbarat agéntliqi, awstraliye tashqiy ishlar ministiri aléksandir downérning " béyjingning yüksiliwatqan tesirini xelq'ara ishlarda mes'uliyetchanliq bilen qollinishi nahayiti muhim " dep tekitligenlikini xewer qildi. Downérning eskertishiche, amérika bilen awstraliye xitayning ijabiy hemkarliqini ümid qilidiken. Rayis aldimizdiki peyshenbe küni awstraliyige yétip baridu.

Yaponiye rayisning bu sepiridiki yene bir ziyaret békiti. U, yaponiyini ziyaret qilghanda xitayning herbiy tereqqiyat ehwalini muzakire qilidiken. Shuning bilen birge rayis seyshenbe küni hindonéziyini ziyaret qilghanda térror, xamas we ottura sherq mesililirini muzakire qilidu. Gherb döletliri xelq'ara mesililerde xitayning mes'uliyetchan rol oynishini ümid qilmaqta. Emma xitay hökümiti béyjingda échiliwatqan xelq qurultiyi yighinida junggoning bu yilqi herbiy xam chotini 14 pirsent östürdi.

Amérika bilen yaponiye xitay herbiy küchi uning bixeterliki üchün zörür bolghan sewiyidin éship ketkenlikini bildürmekte. Birleshme axbarat agéntliqining xewer qilishiche, aléksandir downér " xitayning bash kötirish mesiliside biz amérikiliqlar bilen oxshash tonushqa ige. Biz qarshilishish siyasitini xalimaymiz " deydu. U, " biz hemkarliqni qoghlishimiz " dep tekitligen. (Erkin)