رۇسىيىدە ئەسكەرلەرنىڭ ئۆزىنى ئۆلتۈرۈۋېلىشى ئۆتكەن يىلى ئەڭ ئېغىر بولدى

• 
  2008-01-27

رۇسىيىنىڭ ھەربىي تۈزۈلمىسى سوۋېت ئىتتىپاقى يىمىرىلگەندىن كېيىن كۆپ ئۆزگەرگەن بولۇپ، بۇرۇنقى قاتتىق ئىنتىزام ۋە كوممۇنىستىك ئىدىئولوگىيە رامكىسى ئاستىدىكى تۈزۈم ئەمەلدىن قالدۇرۇلغاندىن بۇيان رۇسىيە ئارمىيىسىدە كونا ئەسكەرلەرنىڭ يېڭى ئەسكەرلەرنى بوزەك قىلىشى ۋە خارلىشى نەتىجىسىدە ئەسكەرلەرنىڭ ئۆزىنى ئۆلتۈرۈۋېلىش ئەھۋالى ئېغىرلاشقان.

رۇسىيىنىڭ "نەۋسرۇ" تورىنىڭ خەۋەر قىلىشىچە، رۇسىيە مۇداپىئە مىنىستىرلىكى ئۆتكەن بىر يىلدا 224 نەپەر رۇسىيە ھەربىي خادىمىنىڭ ئۆزىنى ئۆلتۈرۈۋالغانلىقىنى بىلدۈرگەن.

ئۆتكەن يىلى رۇسىيىنىڭ سىبىرىيە رايونىدىكى بىر تانكا قىسىمىنىڭ يېڭى جەڭچىسىنىڭ كونا ئەسكەرلەر تەرىپىدىن ئۇرۇپ، ھاقارەت قىلىشقا ئۇچراپ، ئىككى پۇتىدىن ئايرىلغانلىقى پۈتۈن رۇسىيىدە زور-زور غۇلغۇلىلارنى قوزغىغان ئىدى. رۇسىيە جامائىتى مۇداپىئە مىنىستىرلىكىدىن بۇنداق كونا ئەسكەرلەرنىڭ يېڭى ئەسكەرلەرنى خارلاش ئەھۋالىنى دەرھال ئېنىقلاپ، جىنايەتچىلەرنى جازالاشنى شۇنىڭدەك مۇداپىئە مىنىستىرىنىڭ ۋەزىپىسىدىن ئىستىپا بېرىشىنى تەلەپ قىلغان ئىدى. رۇسىيە ئىنسان ھوقۇقى تەشكىلاتلىرىمۇ رۇسىيە قوشۇنلىرىدىكى ئىنتىزامسىزلىق شۇنىڭدەك ئەسكەرلەرنىڭ تەمىنات،ئوزۇقلۇق يېتىشمەسلىك قاتارلىق ئەھۋاللىرىنى تەنقىد قىلغان.

رۇسىيە نۆۋەتتە، ھەربىي سىستېمىسىنى ئىسلاھ قىلىشقا، ئادەم سانىنى قىسقارتىپ توختاملىق ئەسكەر تۈزۈمىنى قوللىنىشقا ھەرىكەت قىلماقتا. (ئۈمىدۋار)