Rusiye bilen hindistan transport ayropilani ishlepchiqirish kélishimi imzalidi

Birleshme agéntliqida körsitilishiche, rusiye bilen hindistan hemkarliship transport ayropilani ishlepchiqirish jehette kélishim hasil qilghan bolup, mezkur kélishimge düshenbe küni rusiye prézidénti wiladimir putin we hindistan bash ministiri manmaxan sin'g'hlar imza qoyghan.

Emma, mezkur kélishimde bu ikki dölet arisida muhim shertlerning biri bolup kéliwatqan ré'aktip küreshchi ayropilanlarni hemkarliship yasash maddisi bar yaki yoqluqi téxiche melum emes.

Bu ikki dölet arisidiki herbiy alaqe yéqinqi yillardin buyan xéli chongqurlashmaqta , hindistan rusiyidin herbiy üskünilerni köplep import qiliwatqan bolup, bu jehette xitay bilen teng orun'gha ötken.

Birleshme agéntliqining rusiye prézidénti wiladimir putinning éytqanliridin neqil élip körsitishiche, putin: " söhbet bashtin ‏- ayaq heqiqiy tijaret tüside élip bérildi" dégen we hindistan bash ministirining bu qétimliq rusiye ziyaritining ular üchün élip éytqanda, herqaysi muhim tereplerde uzun mezgillik hemkarliqini tereqqiy qildurushta intayin muhim orunda turidighanliqini ispatlighanliqini bildürgen.

Hindistan bash ministirimu, hindistanning özining yadro énérgiyisi sana'itide rusiye bilen téximu chongqur hemkarliq ornitishni xalaydighanliqini ashkarilighan.

Hazir rusiye hindistanning tamil nadu shtati kudankkulam rayonida bir yadro éléktir istansisi quruwatqan bolup, putin yene, bu ikki dölet arisida, énérgiye munasiwetlirini téximu kéngeytish teshebbusini otturigha qoyghan. (Jüme)