Русийидә ирқичилиқниң күчийиши еғирлашмақта

Йеқинда таҗикистанниң русийидә турушлуқ әлчиханиси 2007-йили 356 нәпәр таҗикистанлиқниң җәсидиниң русийидин вәтинигә елип келингәнликини, буларниң көпинчисиниң рус милләтчилириниң һуҗумлири вә кесәлликләр сәвәбидин өлгәнликини билдүрди.

Таҗикистан инсан һоқуқи тәшкилатлириниң билдүрүшичә, русийидә таҗикларниң җинайи гуруппилар тәрипидин зәрбигә учриши әң еғир болуп, даим дегүдәк таҗиклар өз туғқанлириниң җәсәтлирини русийидин елип келишиду. Нөвәттә, таҗик, өзбек, қирғиз қатарлиқ оттура асиялиқ ишләмчиләр " тақирбашлар" дәп аталған рус милләтчи яшлириниң һуҗум нишаниға айланған.

Америка авази радиосиниң хәвәр қилишичә, йеқинда русийиниң омск областидики бир қурулуш орнида ишләватқан бир топ өзбек ишчилири икки нәпәр рус яшниң зораванлиқиға учриған болуп, улар өзбекләрдин пул тәләп қилип бесим ишләткән. Нәтиҗидә, җедәл чиқип, бу икки рус тоқунушта өлгәндин кейин, мәзкур җайдики сот мәһкимиси өзбек ишчилирини узун муддәтлик қамақ җазаси билән җазалиған. Таҗик, өзбек, қирғиз қатарлиқ көчмәнләр өзлириниң русийидә қоғдашқа игә әмәслики, һәр қандақ җайда милләтчиликкә вә кәмситишкә дуч келидиғанлиқини билдүрүшкән.

Русийә мәтбуатлири русийидә тақирбашлар дәп атилидиған ирқчи вә милләтчи яшлар гурупписиниң саниниң күнсайин ешиватқанлиқи, уларниң оттура асиялиқлар, кавказлиқлар, хитайлар вә башқа қара чачлиқ милләтләргә даим һуҗум қилип,уларға тәһдит пәйда қилидиғанлиқини йезишмақта.

Һазир, 5 милйондәк өзбекистанлиқ, бир милйон әтрапида таҗикистанлиқ вә 500 миңдин артуқ қирғизистанлиқниң қийинчилиқ түпәйлидин русийигә кетип ишләп җан беқишқа вә шу арқилиқ аилисини қамдашқа мәҗбур болғанлиқи мәлум. Русийә милләтчилири буларни қанунсиз көчмән дәп атап русийидин қоғлашни тәләп қилиду. (Үмидвар)