Rusiye chet'elliklerning sodisigha chek qoydi

Rusiye hökümiti chiqarghan chet'elliklerning rusiye tupraqlirida parche sétish sodisigha chek qoyidighan qanuni 1-aprildin étibaren resmiy küchke ige boldi.

Rusiye uchur agéntliqlirining xewerliridin qarighanda, rusiye da'iriliri bu qanun arqiliq qanunsiz köchmenlerning soda-sétiq bilen shughullinishini cheklesh hemde rusiye puqralirining iqtisadini yaxshilashni meqset qilghan bolup, qanun boyiche barliq bazarlardiki soda dukanlirida peqet rusiye puqraliriningla soda qilish hoquqi bar iken.

Bu qanun moskwa qatarliq chong sheherlerdiki soda bazarlirida uzun yillardin buyan dukan échiwatqan chet'ellikler bolupmu, xitay puqralirigha qattiq zerbe bolghan. Chünki, uchurlargha qarighanda, moskwada xitaylarning achqan bir qanche soda nuqtiliri bar iken.

Xewerlerdin qarighanda, rusiyining yiraq sherqidiki xitay bilen chégrilinidighan wladiwostok, xabarowski qatarliq chong kichik sheherliride xitay sodigerliri üstünlükni igiligen. Rusiyining bu qanuni sewebidin nurghunlighan xitaylar mallirini erzan sétip kétishke bashlighan we yaki rusiyilikler bilen hemkarlishish yoli izdigen. Bir qisim közetküchiler bu qanun tüpeylidin mal bahasining örlep kétishi kélip chiqishini perez qilmaqta.

Rusiyining bu qanunni chiqirishidiki seweblerning biri chet'elliklerning bazarni kontrol qiliwélishi shuningdek ötken yili bir qanche bazarlarda yüz bergen partlash we toqunushlar bolup, rusiye hökümiti öz puqralirining iqtisadiy hem qanuniy hoquqini qoghdaydighanliqini bildürgen. Moskwa saqchiliri köp qétim tuyuqsiz tekshürüsh arqiliq köpligen qanunsiz xitay aqqunlirini qolgha alghan.

Qirghizistanmu oxshash bir qanun chiqirip, chet'elliklerning sodisini chekleydighanliqini jakarlighan idi.(Ümidwar)